Foto: Tengrinews.kz/Alihan Sariev
Almatyda №98 avtobýstyń júrgizýshisi adam ólimine ákelip soqqan jol apatyna kináli dep tanyldy, dep habarlaidy "Ult aqparat" qalalyq sottyń baspasóz qyzmetine silteme jasap.
Almaty qalasy Almaly aýdandyq sotynda QR QK-niń 345 babynyń 3 bóligi boiynsha ("Jábirlenýshiniń ólimine ákep soqqan jol qozǵalysy erejelerin buzý") azamat A.-ǵa qatysty qylmystyq is qaraldy.
"Sot 2022 jyldyń 8 qarashasynda, saǵat 14:00 shamasynda aiypker A. №98 avtobýsty basqara otyryp, Abylai han jáne Tóle bi kósheleriniń qiylysynda jol qozǵalysy erejelerin elemei jáne baǵdarshamnyń tyiym salýshy qyzyl belgisine qaramai ótip, Tóle bi kóshesimen kele jatqan № 201 avtobýspen soqtyǵysýǵa jol bergenin anyqtady.
Jol kólik oqiǵasynyń saldarynan №98 avtobýstyń jolaýshylary syrtqa qulap, jábirlenýshi I. avtobýstyń astynda qalyp, alynǵan dene jaraqattarynyń saldarynan kóz jumdy, jábirlenýshi K.-niń densaýlyǵyna aýyr zalal keltirildi jáne jábirlenýshi Sh.-nyń densaýlyǵyna aýyrlyǵy ortasha deńgeidegi ziian tidi" - delingen habarlamada.
QR QK-niń 345 babynyń 3 bóliginiń sanktsiiasy bes jylǵa deiingi merzimge belgili bir laýazymdardy atqarý nemese belgili bir qyzmet túrlerimen ainalysý quqyǵynan aiyra otyryp, bes jylǵa deiingi merzimge bas bostandyǵynan aiyrý túrindegi jazany kózdeidi.
Al QR QK-niń 55 babynyń 2 bóligine sáikes, aiypty jeńildetetin mán-jailar bolǵan jáne aýyrlatatyn mán-jailar bolmaǵan jaǵdaida jazanyń negizgi túriniń merzimi nemese mólsheri jazanyń maksimaldy merziminiń 1⁄2-nen aspaýy tiis, iaǵni QR QK-niń 345 babynyń 3 bóligi boiynsha bas bostandyǵynan aiyrý merzimi 2 jyl 6 aidan aspaýy qajet.
"Osyǵan bailanysty Memlekettik aiyptaýshy sottan aiypker A.-ǵa 2 jyl 6 ai bas bostandyǵynan aiyrý jazasyn taǵaiyndaýdy surady. Al aiypker A. sotta óz kinásin moiyndamai, ózin aqtaýdy surady.
Sot QK-niń 345 babynyń 3 bóligi boiynsha aiypker A.-ny kináli dep tanydy jáne 2 jyl 6 ai merzimge bas bostandyǵynan aiyrý túrindegi maksimaldy jazany, sondai-aq 5 jyl merzimge kólik quralyn basqarý quqyǵynan aiyrý túrindegi qosymsha jaza taǵaiyndady.
Azamat A.-nyń jazasyn jeńildetetin mán-jai – 3 jas balasynyń bolýy, al aiypty aýyrlatatyn mán-jailar joq" - delingen sot habarlamasynda.
Sonymen qatar, moraldyq zalal retinde azamat Sh. jáne K.-niń paidasyna jábirlenýshilerdiń árbirine 2 mln. teńgeden jáne materialdyq ziian retinde Sh.-nyń paidasyna 323 885 teńge óndirilgen.
Úkim zańdy kúshine engen joq.
