KTK kadry
Almatyda jeti jastaǵy Karinany asqan qatygezdikpen uryp óltirdi dep aiyptalǵan áiel bar kináni qyzdyń ákesine artyp otyr. Búgingi sotta aiyptalýshy Baljan Turlybekova ógei qyzy týǵan ákesiniń qolynan qaza tapqanyn aitty, - dep habarlaidy "Ult aqparat" KTK telearnasyna silteme jasap.
Atyshýly iske qatysty kezekti sot otyrysynda kúdikti áiel azamattyq nekedegi kúieýin jamandaýmen boldy. Ol Báken Zakýraevtyń qyzyna únemi qol jumsaǵanyn, sondai-aq ishkilikke qumar bolǵanyn aitty. Karinany ákesi kezekti ret ońbai sabap, aqyry jetkinshek tilge kelmesten kóz jumdy deidi.
"Karina dáretin jiberip qoiyp, ákesi ony jýyndyrýy kerek bolǵan. Men oǵan "tek urma" dedim. Úi jinap júrip vannadan bir dybys shyqty. Baryp qarasam, Karina vannanyń ishinde isinip, qoryldap jatyr. Jýyndyryp bólmege aparyp jatqyzdym. Men tek ony talyp qalǵan eken dep oiladym. Ólip qalady degen oi bolmapty", - deidi aiyptalýshy.
Endi ol "kúieýiniń qylmysyn jasyrmai, áý basta shyndyqty aitý kerek edi" dep otyr.
Eske salaiyq, oqiǵa byltyr shildede boldy. Jeti jastaǵy qyz ógei sheshesinen tórt ai boiy taiaq jep, aqyr sońynda miyna qan quiylyp kóz jumǵan. Qyzdyń ógei sheshesi ári ózin qoǵam belsendisi retinde kórsetetin Baljan Turlybekova qamaýǵa alynǵan edi. Qaitys bolǵan Karinanyń ájesi men ózge de týystary qyzdyń týǵan ákesin de jaýapqa tartýdy talap etken.
