Sýret: videodan kadr
Azamattyq nekedegi áieliniń 4 jasar balasyn uryp óltirgen 19 jastaǵy er adamǵa qatysty sot úkimi shyqty, dep habarlaidy "Ult aqparat".
Almatynyń qylmystyq ister jónindegi mamandandyrylǵan aýdanaralyq soty jas balany óltirdi dep aiyptalǵan er adamǵa qatysty qylmystyq isti qarady.
Sot anyqtaǵandai, er adam 2023 jyldyń tamyz aiynan beri jaldamaly páterde balanyń anasymen birge turyp kelgen. 2023 jyldyń qyrkúiek aiynda sottalýshy jeke óshpendilik jáne balanyń ákesinen kek alý maqsatynda kámeletke tolmaǵan ógei uly H.-ny soqqyǵa jyqqan.
"Sottalýshy balanyń basy men asqazanynan 8-9 ret urǵan. Saldarynan baýyry jarylyp, ishki qan ketýden bala kóz jumdy. Er adam balany ólimshi halde balabaqshaǵa aparyp tastaǵan. Nátijesinde, bala balabaqshadan aýrýhanaǵa jetkizildi, birneshe kúnnen keiin ol aýrýhanada alǵan jaraqattardan qaitys boldy", – dep habarlady sottyń baspasóz qyzmeti.
Prokýror aiyptalýshyny 20 jylǵa bas bostandyǵynan aiyrýdy surady. Sottalýshy óz kinásin moiyndamady.
Sot er adamdy ógei ulyn óltirgeni úshin kináli dep taýyp, 20 jylǵa bas bostandyǵynan aiyrdy. Sottyń úkimi áli zańdy kúshine engen joq.
Tórt jasar Hantóreni anasy azamattyq nekedegi kúieýine qaldyryp jumysqa ketken. Sol ýaqytta jas jigit búldirshindi soqqyǵa jyǵyp, balabaqshaǵa aparyp tastaǵan. Aýyr jaraqat alǵan balanyń jaǵdaiy bóbekjaida kúrt nasharlap, aýrýhanadan bir-aq shyqqan. Ish qurylysy zaqymdanǵan bala tórt kúnnen keiin jansaqtaý bóliminde kóz jumdy.
