Almatyda ortalyqtandyrylǵan kitaphanalar júiesin aýqymdy jańǵyrtý maqsatynda júrgizilgen jóndeýden keiin Krylov atyndaǵy qalalyq balalar kitaphanasy paidalanýǵa berildi, dep habarlaidy "Ult aqparat".
Megapolis ákimi Baqytjan Saǵyntaev Instagram-daǵy paraqshasynda Áýezov kóshesi, 175 mekenjaida ornalasqan I. Krylov atyndaǵy qalalyq balalar kitaphanasynyń aýqymdy jóndeý jumysynan keiin qaita ashylǵanyn, munda zamanaýi ári jaily oqý zaldary men túrli úiirmelerge arnalǵan oryndar paida bolǵanyn jazdy.
«Altyn shańyraq» mádeniet pen tarihty zerdeleý ortalyǵymen qatar ziiatkerlik oiyn men dombyrany, kompiýterlik saýattylyqqa oqytatyn jańa ortalyqtar ashylýda. Sondai-aq, mundaǵy ártúrli jastaǵy balalarǵa arnalǵan «Kreativti shyǵarmashylyq», «Jas ǵalym» klýbtary men «Oqimyz, úirenemiz, oinaimyz» úiirmesi de qyzyqqa toly orta», - dep atap ótti Saǵyntaev.
Búgingi kúni kitaphana qorynda 242 myń kitap bar, onyń 45 myńy qazaq tilinde. Qyzmet kórsetýdiń jańa modeli túrli is-sharalardy joǵary deńgeide ótkizýge, sondai-aq kelýshiler sanyn jylyna 250 myń adamǵa deiin arttyrýǵa múmkindik bermek.
Kitaphana saǵat 9.00-den 20.00-ge deiin demalyssyz jumys isteidi.
Almatydaǵy 25 kitaphananyń 16-sy jańa formatta jumys isteidi. Biyl qalǵan kitaphanalardy modernizatsiialaý josparda.
