Almatyda joǵalyp ketken 9 jasar Mesýt Myrzaqulov tabyldy, dep habarlaidy "Ult aqparat".
Qalalyq politsiia taratqan aqparatqa sáikes, bala din aman.
«Mesýt dosyna qonaqqa barǵan. Atasy men ájesine sol úide ekenin aitqan. Kesh bolyp ketkendikten sol úige qonǵan. Balanyń isin shalalyq deýge de bolady. Biraq túnimen balany politsiia men kinologtar izdedi. Tańerteń izdeý sharalaryna muǵalimder men eriktiler qosyldy. Balanyń din aman tabylǵanyna qýanyshtymyz.
Qazir ony ata-anasyna tabystap jatyrmyz. Izdeýge atsalysqan azamattarǵa kóp rahmet», - dedi qalalyq Politsiia departamenti basshysynyń birinshi orynbasary Nurlan Almasbekov.
Buǵan deiin Almaty politsiiasy 9 jastaǵy Mesýt Myrzaqulov 1 qyrkúiekte túski 13:00-de úiinen shyǵyp sodan oralmaǵanyn habarlaǵan bolatyn.
Oqýshy ájesi jumys isteitin №33 mektepke barǵany anyqtaldy. Beinebaqylaý kameralary balanyń Sh.Qaldaiaqov kóshesimen ońtústik baǵytta kele jatqanyn kórsetti. Onyń úii jeke sektorda, taýǵa jaqyn, Keńsai ziratynyń artynda ornalasqan.
Ony izdestirýge 250 adam jumyldyryldy. Ulttyq ulannyń 100 jaýyngeri, jedel áreket etý bóliminiń 20 qyzmetkeri, iývenaldy politsiianyń 50 inspektory jáne aýdandyq deńgeidegi ýchaskelik politsiia inspektory, qalalyq kriminaldyq politsiianyń 40 jedel ýákili, Mesýt oqityn mektepten 20 erikti jáne 5 muǵalim tartylǵan edi.
