Almaty balabaqshalarynyń birinde balalar ózderinen kishi balany uryp-soqqan. Oqiǵanyń videosy áleýmettik jelide tarady. Soǵan bailanysty qala ákimdigi jaǵdaidy túsindirdi, dep habarlaidy Sputnik Qazaqstan.
Oqiǵa 2021 jyldyń 24 jeltoqsanynda Almaty qalasy Áýezov aýdanynda №58 balabaqshada bolǵan. Balalar 2017 jyly týǵan balaǵa kúsh kórsetken. Soǵan qatysty qyzmettik tekserý júrgizildi.
"Nátijesinde tártip buzýshylyqqa jol bergeni úshin top tárbieshisi men balabaqsha meńgerýshisi qyzmetinen bosatyldy. Áýezov aýdanynyń mektepke deiingi tárbie jáne oqytý bóliminiń basshysy men bilim bóliminiń basshysyna baqylaýdy álsiretkeni úshin tártiptik jaza qoldanyldy", - dedi Almaty qalasy bilim basqarmasy.
Balabaqsha tárbielenýshisine ata-anasynyń kelisimi negizinde psihologiialyq qoldaý kórsetilip jatyr. Balanyń jaǵdaiy jaqsy, dep naqtylady basqarma.
Búldirshinge qol kótergen tárbieshi ózine qol saldy
Jýyrda Almatyda balabaqshada tárbieshiniń balany urǵan sátinen video tarady. Jelide taraǵan videoda "Erni jarylǵan. Oqtaýmen urǵannan deneleri kógerip ketken, qulaqtary men shashynan julǵan. Bul ózi balabaqsha ma? (...) Balalardy senip tapsyrǵan tárbieshi olardy azaptap jatyr. Osydan keiin ózge tárbieshilerge, jalpy balabaqshaǵa degen senim joǵalady" dep jazylǵan.
Soǵan bailanysty Almaty qalasy politsiia departamentinde bul fakt Qylmystyq kodekstiń 140-baby ("Kámeletke tolmaǵan adamdy tárbieleý jónindegi mindetterdi oryndamaý") 2-bóligine sáikes sotqa deiingi tergeýdiń biryńǵai tizimine tirkelgenin habarlady.
Artynsha 28 jeltoqsanda búldirshinderge qol kóterdi degen kúdikke ilingen tárbieshi ózine qol jumsap, kóz jumǵany belgili boldy.
"Almaty qalasynyń politsiia departamenti 1979 jyly týǵan áieldiń ózine qol jumsaǵanyn rastaidy. Oqiǵanyń mán-jaiy anyqtalyp jatyr", - dep habarlady departament.
Qazir Jetisý aýdany politsiia bólimi Qylmystyq kodekstiń 105-baby "Óz-ózine qol jumsaýǵa jetkizý" boiynsha sotqa deiingi tergeýdi bastady.
