Almatyda jedel járdem qyzmetiniń 400-den astam qyzmetkeri "koronavirýspen kúreske úles qossaq ta, jeti aidan beri ústemaqy almadyq" dep shaǵymdanady. 8 qazanda Almatydaǵy Adam quqyǵyn qorǵaý jónindegi halyqaralyq biýro keńsesinde máselelerin aitqan qyzmetkerler "koronavirýs juqtyrǵan naýqastarmen tikelei jumys istemesek te olarmen bailanysta bolǵan adamdarmen birge istep, basymyzdy qaýipke tiktik" deidi. Bul jiynǵa 400-den astam qyzmetkerdiń atynan kelgen bastama tobynyń ókilderi (3 adam) qatysty.
– Mysaly, biz sol stantsiiada tazalyq jumystarymen ainalysamyz. Kólikterdi tazalaý, dárigerlerge qajetti kiimderdi jýý - bizdiń moinymyzda. Basshylyq kúnde erteń deýmen keledi. Jeti ai boldy. Biz óz jalaqymyzdan tysqary "Nur Otan" bergen 50 myń teńgeden basqa artyq aqsha kórmedik. Aramyzda jumys babynda júrip virýs juqtyrǵandar da bar, - deidi Toǵjan Jamyrova esimdi qyzmetker.
Shaǵymdanýshy top ókilderiniń sózine qaraǵanda bastapqyda olardy koronavirýs juqtyrǵan naýqastarmen jumys istegen úshinshi kategoriiadaǵy meditsinalyq qyzmetkerlerdiń tizimine engizgen. Keiinirek tizimnen alynyp tastalǵan.
Jedel járdem qyzmetkerleri maýsym aiynda da ózderine tiisti ótemaqynyń berilmei jatqanyn aityp narazylyq bildirgen bolatyn.
Qazaqstanda zań boiynsha koronavirýspen kúresken meditsina qyzmetkerlerine úsh kategoriia boiynsha ústemaqy tólenedi. Sońǵy kategoriiaǵa engen meditsina qyzmetkerlerine 200 myń teńgeden astam ústemaqy beriledi.
Jedel járdem stantsiiasynyń bas dárigeri Birjan Ospanov Azattyq tilshisine bergen jaýabynda shaǵymdanǵan qyzmetkerlerdiń ústemaqy alýǵa quqyǵy bar ekenin rastap, jaqynda olarǵa tólenetinin aitty.
"Qujattar máselesi sheshilýge az qaldy. Jaqynda 415 qyzmetkerdiń barlyǵy ústemaqy alady. Biz bul jóninde ózderine de aityp túsindirgenbiz. Biraq qazir ne úshin shaǵymdanyp jatqanyn bilmeimiz" dedi ol.
Kóktem men jaz ailarynda da ondaǵan meditsina qyzmetkeri "koronavirýs juqqan naýqastardy emdesek te ústemaqy almadyq" dep shaǵymdanǵan. Keibiri ústemaqynyń durys eseptelmegenin alǵa tartqan.
Resmi málimet boiynsha, 12 830 myń meditsina qyzmetkerine koronavirýs juqqan: 8 339 dárigerdiń virýsty jumysta juqtyrǵany anyqtalǵan. 182 dáriger koronavirýstan qaitys bolǵan.
Koronavirýs nemese koronavirýstyq pnevmoniia juqtyrǵan meditsina qyzmetkerine – 2 mln teńge, koronavirýstan qaitys bolǵan meditsina qyzmetkeriniń otbasyna 10 mln teńge kóleminde ótemaqy beriledi.
