Almatyda jedel járdem shaqyrtý edáýir azaidy. Bul týraly onlain brifing barysynda Qoǵamdyq densaýlyq saqtaý basqarmasynyń basshysy Kamaljan Nadyrov aitty, dep habarlaidy "Ult aqparat".
«Jedel járdem jumysynda suranystyń azaiǵany baiqalady. Ótinishter men shaqyrtý sany sońǵy aida 1-3 sanat boiynsha 2200-den 1400-ge deiin jáne 4 jedeldik sanaty boiynsha 280-den 170-ke deiin azaidy. Virýs órshigen shaqta biz múldem basqa kórsetkishterdi baiqaǵan edik. Jedel járdem táýligine 8 000-ǵa deiin ótinish qabyldasa, árbir ekinshi qońyraýdan soń brigada naýqastyń úiine bardy», - deidi Kamaljan Nadyrov.
Sonymen qatar, ol qalaǵa qosymsha 55 jedel járdem kóligi satyp alynatynyn atap ótti.
«Jedel meditsinalyq járdem qyzmetinde 3 myńnan astam adam jumys isteidi. 180 brigada jumyldyrylǵan. Onyń ishinde 365 dáriger, 1 388 feldsher bar. Osy turǵyda jedel járdem qyzmeti kúzgi jáne qysqy kezeńge daiyn ekenin atap ótken jón. Virýs órshigen shaqta qyzmet kórsetý táýligine 500-ge deiin patsientti qabyldaýy múmkin degen boljam bar. Qosymsha 55 jedel járdem kóligi kelip túsedi dep kútilyp otyr», – dedi ol.
