Almaty qalalyq jasyl ekonomika basqarmasynyń basshysy Erjan Seitenov «Almaty qalasynyń erekshe mártebesi týraly» Zańyna engizilgen ózgerister men tolyqtyrýlar aiasynda jasyl qordy damytý perspektivalary týraly aiyp berdi, dep habarlaidy "Ult aqparat".
Atalǵan Zańǵa birqatar jańa erejeler engizildi:
– Aǵashtardy sanitarlyq kesý, jasartý Almaty ákimdiginiń kelisimimen ǵana júrgiziledi;
- Ákimdiktiń ruqsatymen sanitarlyq jolmen nemese ádeii kesilgen aǵashtardyń ornyna jasyl jelek qaita otyrǵyzylady, magistraldy kóshelerdiń boiyna dińgegi 20-25 sm bolatyn japyraqty aǵash túrleri otyrǵyzylady, qylqan japyraqty aǵashtardyń biiktigi - kem degende 2,5 metr (I nemese II synypty sapa) bolýy tiis;
– Kesilgen aǵash shyǵynyn óteýdiń ádisi jasaldy, sonyń arqasynda keltirilgen zalaldyń naqty baǵasy anyqtalady;
– Aǵash apatty jaǵdaida kesilse, onyń ornyna bir aǵash otyrǵyzylady, eger zańsyz alynsa, onda bir aǵashtyń ornyna 100 túp otyrǵyzylady;
– Jasyl jelektiń kepil merzimi – 3 jyl;
– Jaýapty mekeme ortaq qoldanystaǵy jerlerdegi jasyl jelekti kóktemgi-jazǵy jáne jazǵy-kúzgi mezgilderde ziiankesterden, túrli aýrýlardan qorǵaý úshin zalalsyzdandyrý jumystaryn júrgizýi tiis.
«Bizde Almaty qalasynyń jasyl jelegin kútip ustaý men qorǵaýdyń jeke erejelerin ázirleý jáne bekitý múmkindigi paida boldy. Buǵan deiin basqarma qalanyń jasyl qorynyń damýy men saqtalýyna kedergi keltiretin túrli máselelermen betpe-bet kelgen bolatyn. Eldi mekender aýmaǵynda ósetin jasyl jelekterdi kútip ustaý jáne qorǵaý máselelerin retteitin standarttardyń, reglamentterdiń, nusqaýlyqtardyń, ádistemelik usynymdardyń bolmaýy, ruqsat berý qujatynsyz aǵashtardy kesý úshin ótemdik otyrǵyzý boiynsha normalardyń bolmaýy - megapolistiń jasyl qorynyń joiylýyn jedeldetetin sebepterdiń biri edi», - deidi Erjan Seitenov.
Basqarma basshysynyń aitýynsha, jańa ereje jobasy jurtshylyqtyń talqylaýyna shyǵarylady, belsendi qala turǵyndary qatysyp, óz usynystaryn engize alady.
«Barlyq múddeli mekeme jáne uiymdarmen kelisilgennen keiin jasyl jelekti kútip ustaý men qorǵaýdyń jańa erejeleri qalalyq máslihatqa bekitýge jiberiledi», - dep qorytyndylady E. Seitenov.
