Almaty qalasynyń ekologiialyq problemalaryn talqylaýǵa arnalǵan kezdesý barysynda jasyl jelekterdiń róli talqylandy, dep habarlaidy "Ult aqparat".
Qazirgi tańda, Almatyda jasyl jelek alańdarynyń aýdany - 1 427 gektar. Al aǵashtardyń sanyn 2,2 mln.
Ekologiialyq retteý jáne baqylaý komitetiniń tóraǵasy Zýlfýhar Joldasovtyń aitýynsha, bul kórsetkishti 2 myń gektarǵa jetkizý qajet. Al aǵashtardyń sanyn 3 millionǵa deiin kóbeitý kerek.
«Aǵashtar - bul jalǵyz tabiǵi filtr. Sondyqtan qorshaǵan ortanyń sapasyn jaqsartý úshin apattyq jáne sanitarlyq jaǵdailardy qospaǵanda, aǵashtardy kesýge tyiym salyp, jaýapkershilikti kúsheitý kerek», - dep atap ótti ol.
Mamandardyń aitýynsha, bir adamdy ottegimen qamtamasyz etý úshin 1,54 aǵash qajet. Bir aǵash bir avtokólikten shyqqan shyǵaryndylardy sińiredi. Bir aǵash 80 keli ziiandy zat pen 20 keli shańdy zalalsyzdandyrady.
Óz kezeginde, Almaty qalasynyń jasyl ekonomika basqarmasynyń bastyǵy Natalia Livinskaia megapoliste jasyl jelekterdiń aýmaǵyn ulǵaitý mindeti turǵanyn atap ótti.
«Biz qalanyń jasyl qoryn arttyrý josparyn júzege asyryp jatyrmyz. 3 jyl ishinde qala ainalasynda 1 millionǵa jýyq jasyl jelek otyrǵyzylady. Biyl biz 250 myń aǵash otyrǵyzamyz. 2016 jyly jasyl jelekterdi túgendeý jumystary qolǵa alyndy. Osy málimetter negizinde jasyl jelekterdiń tizilimi jasalady. Biz jyl sońyna deiin jumysty aiaqtap, kelesi jyldyń basynda usynamyz», - dedi Natalia Livinskaia.
