Almatyda jappai tártipsizdik kezinde 291 ǵimarat, onyń ishinde 62 ákimshilik ǵimarat zardap shekti. Bul týraly brifing barysynda qala ákiminiń orynbasary Muhit Ázirbaev aitty, dep habarlaidy QazAqparat.
«12-16 qańtar aralyǵynda órtten zardap shekken úi-jailardy tazartý júrgizildi. QazQSǴZI «Qazaqstan» telearnasynyń, Bas prokýratýranyń ókildiginiń, Almaty politsiia departamentiniń jáne aýdandyq politsiia basqarmalarynyń ǵimarattaryndaǵy tehnikalyq tekserýdi aiaqtady. Qalalyq ákimdik ǵimaraty boiynsha zertteý nátijeleri 2022 jyldyń 28 qańtaryna kútilýde», - dedi ákim orynbasary.
Onyń aitýynsha, smetalyq norma boiynsha jalpy somasy 28,6 mlrd teńgege 10 nysandy qalpyna keltirý jumystarynyń aldyn ala quny eseptelgen.
««Qazaqstan» telearnasy 1 tamyzǵa deiin, al qalalyq ákimdik ǵimaratyna 5 aida kúrdeli jóndeý men qaita jańartý jumystary jasalady dep kútilýde. Sondai-aq, jeti nysanda, onyń ishinde Bas prokýratýra ǵimaratynda, politsiia departamentiniń toǵyz ǵimaratynda aǵymdaǵy jóndeý jumystary bastaldy. Aǵymdaǵy jóndeýdiń barlyq nysandary boiynsha josparly aiaqtaý merzimi – 1 mamyrǵa deiin», - dep naqtylady Muhit Ázirbaev.
Spikkerdiń sózinshe, biznestiń áleýmettik jaýapkershiligi esebinen memlekettik organdardyń 28 nysanynda jóndeý jumystary júrgizilýde.
Atap aitar bolsaq, bes densaýlyq saqtaý nysanynyń úsheýinde jumystar aiaqtaldy, úsh aýdandyq politsiia basqarmasynda olardy 28 qańtarǵa deiin aiaqtaý kózdelgen.
Zardap shekken 20 modýldik politsiia beketteriniń beseýi janyp ketken – olardyń ornyna jańalary ornatylady, taǵy 15-i qalpyna keltiriledi, olardyń 9-da jumystar aiaqtalý satysynda.
«Búginde jumys komissiiasy Almatyda 281 ShOB nysanyn anyqtady, onda jóndeý qajet, olardyń segizine kúrdeli. Zardap shekken nysandardyń jalpy sanynan 184-i boiynsha tehnikalyq tekserý bastaldy, 87-i memlekettik saraptamaǵa joldandy, 24-i rastaldy. Qalǵan 97shaǵyn jáne orta biznes sýbektisi óz qarajaty esebinen qalpyna keltirilip, 13 nysanda jóndeý-qalpyna keltirý jumystary aiaqtaldy», - dedi qala ákiminiń orynbasary.
Sonymen qatar, ol tártipsizdik kezinde 11 turǵyn úi zardap shekkenin jetkizdi. Olardy qalpyna keltirý jumystar osy aptada bastalady. Búgingi kúni terezesi synǵan 51 páterdiń áinegi salyndy.
