Almatynyń Bostandyq aýdanynda qaladaǵy alǵashqy jańǵyrtylǵan kommýnaldyq bazar ashý josparlanyp otyr, dep habarlaidy ult.kz.
«Qazaqfilm» shaǵynaýdanynda ornalasqan nysan shamamen 100 saýda ornyna eseptelgen. Qazirgi ýaqytta munda qurylys-montaj jumystary men aýmaqty kórkeitý aiaqtalýǵa jaqyn.
Bazar Almatynyń dizain-kodyna sai biryńǵai stilde bezendiriledi. Munda jabyq jáne ashyq saýda oryndary, qoǵamdyq tamaqtaný núkteleri, sanitarlyq toraptar, avtoturaq, aialdama kesheni jáne qoǵamdyq keńistikter qarastyrylǵan.
Jabyq bólikte otandyq taýar óndirýshilerdiń ónimderi usynylady. Al ashyq alańda fermerler qatysatyn demalys kúngi jármeńkeler uiymdastyryla beredi.
Nysandy jańǵyrtý jumystary jeke investitsiia tartý arqyly júzege asyrylýda. Bul rette, bazardyń áleýmettik baǵyty saqtalady.
