Almatyda aǵaiyndylar úsh adamdy ádeii qaǵyp ketken bolatyn. Zardap shekkenderdiń biri oqiǵanyń mán-jaiyn baiandady. Ol ózderin basqa bireýlermen shatastyryp alǵanyn aitady, dep habarlaidy KTK telearnasy.
Oqiǵa saldarynan Sergei Hannyń aiaq-qoly synǵan. Qazir aýrýhanada jatyr. Ol oqiǵanyń qalai bolǵanyn baiandap berdi. Sergeidiń aitýynsha, mas er adam aldymen onymen sózge kelgen, keiin judyryq ala júgiripti. Budan soń jigitterdi ádeii kólikpen basyp ótpek bolǵan.
"Kórshi ǵimaratta jigitterdiń bir-birimen aiǵailap, janjaldasqanyn kórdim. Biraq mán bermedik. Kóp uzamai, on shaqty jigit bizge kelip balaǵattai bastady. Esh nárseni túsinbedik. Biz tórteý boldyq. Basqa bireýmen shatastyryp alǵan shyǵar dep oiladyq. Keiin inime judyryq siltedi. Osydan tóbeles bastalyp ketti. Sodan keiin kólikterine otyryp, ses kórsetkileri keldi", - deidi Sergei Han.
Sergei olardyń qolynda qarý bolǵanyn kórgen. Alaida jigit júrgizýshilerdiń túrin anyq kóre almapty.
Kúdiktiniń anasy Sergei men onyń dostarynyń ózderi kinálap, video jariialaǵan bolatyn. Áiel balasy túnde týysynyń týǵan kúnine barǵanyn aitqan. Al mekemeden shyqqan kezde oǵan 13 adam jabyla ketipti.
Kólik júrgizýshisi áli izdestirilip jatyr. Ádeii adam qaqqan eki jigit 15 jylǵa deiin bas bostandyǵynan aiyrylýy múmkin.
Esterińizge salaiyq, 26 tamyzda tańǵy saǵat 5-te Almaty qalasy Bostandyq aýdany Gagarin kóshesinde bolǵan qaqtyǵystan keiin bir taraptyń ókilderi óz qarsylastaryn avtomobilmen qaǵyp, qylmys ornynan boi tasalaǵan. Video áleýmettik jelide tarady.
Gagarin kóshesinde adamdardy qasaqana qaqqan kúdiktilerdiń biri 26 tamyz kúni keshke ustalǵan bolatyn. Ol - Almaty oblysy Eńbekshiqazaq aýdanynyń turǵyny, 1995 jyly týǵan A. esimdi azamat. Ol, QR Qylmystyq kodeksiniń 128-baby tártibinde ýaqytsha ustaý izoliatoryna qamaldy. Er adam qylmys jasaý kezinde aq tústi Toyota Camry markaly avtokóligin basqarǵan.
Adamdy qasaqana qaǵý isi boiynsha aiypturaǵyna qamalǵan avtokóliktiń memlekettik nómiri buǵan deiin de bir iske qatysy bar bolǵany anyqtaldy. Atap aitqanda, 2017 jyly dál osyndai memlekettik nómirli kólik mingen júrgizýshi esirtkige elitip kólik basqarǵany úshin ustalǵan.
Kúdiktilerdiń anasy Názira Álikeeva uldary mundai is áreketke ózderin qorǵaý úshin bardy dedi.
Politsiia adamdardy qaqqan kólikterdi taýyp tárkiledi. Eki kólikti aiǵaqzattar retinde QR QK-niń 24-baby 3-bóligi jáne 99-babynyń 2-bóligi boiynsha qozǵalǵan qylmystyq is materialdaryna tirkedi.
