Almaty qalasynda Ulttyq dombyra kúnine orai qala ákimdiginiń qoldaýymen «Dombyra – dastan» atty aýqymdy merekelik kontsert uiymdastyryldy. Alataý dástúrli óner teatrynyń ashyq alańynda ótken mádeni sharaǵa myńdaǵan qala turǵyndary men qonaqtary jinalyp, qazaqtyń tól óneri men ulttyq mádenietiniń mereiin asyrǵan erekshe keshtiń kýási boldy.
Kesh barysynda elimizdiń tanymal dástúrli jáne estrada ónerpazdary bir sahnada bas qosyp, kórermenge ulttyq naqyshtaǵy bai kontserttik baǵdarlama usyndy. Sahna tórinde «MýzART» toby, Ramazan Stamǵaziev, Aigúl Qosanova, Baǵlan Bábijan, Tileýles Qurmanǵaliev, Nurken Áshirov, Uljan Baibosynova, Sholpan Darjanova, Murat Ábýǵazy, Ardaq Isataeva, Ardaq Eleýsiz, Toǵjan Úmbet, Erkin Shúkiman, Saia Mahambet, «Qońyr» toby, «Qurmanǵazy» orkestri, «Saltanat» bi ansambli óner kórsetip, ulttyq ónerdiń tereń tamyry men ómirsheńdigin aishyqtaityn áserli týyndylaryn oryndady.
Kontsert barysynda kúi men terme, halyq ánderi men zamanaýi mýzykalyq shyǵarmalar úndesip, ulttyq ónerdiń dástúri men búgingi tynysyn toǵystyrǵan mazmundy mádeni baǵdarlama usynyldy. Dombyranyń kúmbirlegen úni kórermenge halqymyzdyń tarihyn, rýhyn, eldik muratyn jáne ulttyq biregeiligin tereń sezindirip, erekshe rýhani áser syilady.
«Dombyra – dastan» merekelik kontserti qala turǵyndary men qonaqtaryna kóterińki kóńil kúi men jarqyn emotsiia syilady. Ashyq aspan astyndaǵy mádeni kesh ulttyq ónerdi dáripteitin mańyzdy alańǵa ainalyp, túrli býyn ókilderin ortaq rýhani qundylyqtar tóńireginde toǵystyrdy.
Fotolar: Almaty qalasy ákimdigi
