Almaty ákimi Baqytjan Saǵyntaev Ortalyq kommýnikatsiialar qyzmetinde ótken brifing barysynda qalanyń tómengi jaǵynda týristerge arnalǵan tramvai júrgiziletinin aitty, dep habarlaidy QazAqparat.
«Týristik tramvai júretin bolsa, ol sheteldik týristerge qyzyq bolatyn marshrýttarmen júrýi tiis. Biz ol úshin 100 jyl buryn salynǵan aǵash úiler ornalasqan Úlken jáne kishi stanitsa aýdanyn tańdadyq. Qazir ol úilerdi restavratsiiadan ótkizip jatyrmyz. Ár úidiń tarihy bar.
Qashan ekeni áli belgisiz. Eger osy jobany júrgizip jibersek jaqsy bolar edi», - dedi ákim.
Aita ketý kerek, biyl aqpanda Almaty turǵyndarymen kezdesýinde Baqytjan Saǵyntaev Stambýldaǵydai týristerge arnalǵan tramvai shyǵarýdy usyndy.
«Meniń oiymsha, burynǵy tramvai júiesin qaitarý múmkin emes. Bul bizdiń qalamyzdyń tarihy bolyp qalady. Qazir elektr jelisimen júretin elektrobýstar, BRT, LRT siiaqty kóliktermen sheshilip jatyr», - dedi ol.
Týristik tramvai Kókbazar mańaiymen júretin bolady.
«Ol jaqta arnaiy kóshe bar. Ol kóshede tramvai júredi. Bul kólik eski qalany aralatyp kórsetedi. Kókbazardyń ainalasynda bizde de eski úiler kóp. Bizde osy oraida ideia týdy. Biz de eski qalany aralataý úshin qalaǵa kelgen týristerge osy múmkindikti paidalansaq. Al, barlyq qalada qaitadan tramvai jelisi salynbaidy», - dedi ákim.
