Almatyda karantin kezinde qonaqtardy qabyldaǵan restobar anyqtaldy, dep habarlaidy "Ult aqparat".
Almaty qalalyq PD baspasóz qyzmetiniń málimetinshe, karantin rejimin buzǵan restobar ál-Farabi dańǵylynda ornalasqan. Bardyń 10 qyzmetkeri 12 qonaqqa qyzmet kórsetken.
«Kelýshiler men qyzmetkerlerdiń arasynda eki kámeletke tolmaǵan bala bar. Olardyń biri daiashy bolyp jumys istese, ekinshisi eresek dostarynyń qasynda boldy. Uldar 13 jasta. 22 adamǵa qatysty tótenshe jaǵdai rejimin buzǵany jáne sanitarlyq-epidemiologiialyq normativterdi saqtamaǵany úshin QR Ákimshilik quqyq buzýshylyq týraly kodeksiniń 476-babynyń 6-tarmaǵyna sáikes ákimshilik hattamalar toltyryldy. Al kámeletke tolmaǵan eki balanyń ata-anasy 422-baptyń 2-bóligi boiynsha quqyq buzýshylyq negizinde jaýapqa tartylady. Sonymen qatar, restobar jumysshylarynyń arasynda sheteldik azamattar da bolǵan. Ózbekstannyń úsh azamaty da respýblikanyń kóshi-qon zańnamasyn buzǵany úshin 517-baptyń 5-tarmaǵy boiynsha ákimshilik jaýapkershilikke tartyldy», – deidi Almaty qalalyq PD basshysynyń orynbasary Berik Ábilbekov.
Sonymen qatar, ol jaýapqa tartylǵandar arasynda mekemeniń basshysy 1992 jyly týǵan J.esimdi azamattyń da bar ekenin atap ótti.
«Qatysqandardyń eshqaisysy karantin jáne qaýipsizdik sharalary týraly estimegen siiaqty bolyp kórindi. Bul keibir jaýapsyz azamattardyń paida tabý maqsatynda qoǵamǵa qaýip tóndiretin túsinbeitindigi jáne biznesti densaýlyqtan basymyraq qarastyratyndyǵy alańdatady. Tótenshe jaǵdailar men karantinde mundai faktilerge jol berilmeidi.Kináliler zańǵa sáikes jazalanady», – dedi Ábilbekov.
