Almatyda koronavirýstyń jańa tolqynyna daiyndyq aiasynda telemeditsina ortalyǵy quryldy, dep habarlaidy QazAqparat.
Óńirlik kommýnikatsiialar qyzmetiniń alańynda ótken onlain-brifing barysynda Almaty qalasynyń qoǵamdyq densaýlyq saqtaý basqarmasynyń basshysy Kamaljan Nadyrov koronavirýstyń ekinshi tolqynyna daiyndyq aiasynda jasalyp jatqan sharalar týraly aitty. Endi almatylyqtar meditsinalyq keńesti telemeditsina kómegimen ala alady.
Ol úshin Almatyda telemeditsina ortalyǵy quryldy. K.Nadyrovtyń aitýynsha, atalǵan ortalyqtyń mindeti - COVID-19 virýsy bolýy yqtimal jáne rastalǵan jaǵdailary bar naýqastarǵa keńes berý jáne monitoring júrgizý.
«Bul COVID-19 virýsyn emdeý boiynsha biregei qyzmet bolyp otyr. Ol úshin meditsinalyq aqparattyq júielermen integratsiialanatyn baǵdarlama ázirlenýde. Telemeditsina ortalyǵynyń dárigeri beinekeńes júrgizedi, naýqastyń jaǵdaiyn baǵalaidy, em taǵaiyndap, naýqastyń elektrondyq kartasyna ózgerister engizip otyrady. Bul sonymen qatar barlyq COVID-19 jaǵdailarynyń biryńǵai elektrondyq bazasy bolady»,- dep túsindirdi K.Nadyrov.
Sondai-aq, osy ortalyqtyń mańyzdy fýnktsiialarynyń biri – naýqastardyń karantin rejimin saqtaýyn baqylaý. Ortalyq qyzmetkerleri ambýlatoriialyq deńgeide em alyp jatqan naýqastarǵa beineqońyraý shalyp turady.
«Úi rejiminiń buzylýy anyqtalǵan jaǵdaida taýarlar men qyzmetterdiń sapasy men qaýipsizdigin baqylaý komitetiniń aýmaqtyq departamentine tiisti signal beriledi, odan ári qalalyq bas memlekettik sanitar dárigeriniń qaýlysyna sai tártip buzýshyǵa aiyppul jazylady. Tártipti óreskel buzýshylar qala emhanalarynyń birine májbúrli túrde jatqyzylady. Bul - óte mańyzdy jait, óitkeni bizdiń mindetimiz - qalada infektsiianyń taralý qaýpin barynsha tómendetý», - deidi basqarma basshysy.
