Almatyda jaýǵan jaýynnyń arty qarǵa ulasty, dep habarlaidy QazAqparat.
Keshe túngi 01.00-de bastalǵan jaýyn-shashynnyń artynan 9.00-de taýly jáne taý bókterlerindegi aimaqtarǵa 40 sm, al qalaǵa 5-8 sm qar tústi. Qalanyń joǵarǵy bóliginde kóktaiǵaqtyń aldyn alý úshin qar jaýa bastasymen kóktaiǵaqqa qarsy material sebilip, qardy tazalaý bastaldy.
Trotýar, jaiaý júrginshi alańdary, qoǵamdyq kólik aialdamalary, qaltarystaǵy joldardy jáne basqa da qoǵamdyq oryndardy tazalaýǵa kóńil bólindi.
Oǵan túnde 498 tehnika jumyldyryldy, onyń 178-i qum shashatyn tehnika. Sonymen qatar 280 jumysshysy jol tazalaýǵa shyqty.
Saǵat 09.00-degi jaǵdai boiynsha qalada 920 tonna taiǵaqqa qarsy material paidalanyldy.
Búgin tańerteń 545 tehnika, onyń ishinde 197 qum shashqysh pen 1 494 jol jumysshysy jumyldyryldy.
Qazgidromettiń boljamy boiynsha jaýyn-shashyn búgin tústen keiin toqtaidy.
