Foto: ortcom.kz
Almaty ákimi Erbolat Dosaevtyń Áýezov aýdanynyń turǵyndarymen kezdesý kezinde qala turǵyny taksi, kólik máselesin kóterdi, dep habarlaidy "Ult aqparat" Kazinformǵa silteme jasap.
«Almatyǵa ózbektiń, tájiktiń, qyrǵyzdyń, mońǵoldyń kólikteri týrist bolyp keledi da, keiin qalada taksi bolyp ketedi. Qazir Yandex, InDriver arqyly taksi bolyp júrgen mundai 70 myń kólik bar. Bul kólikterdiń baǵasy bizde 7 mln teńgeden bolsa, Tájikstanda 3 mln teńgege satylady. Bul kólikter bizde bir jyl taksi bolady, keiin olardy laqtyryp tastaidy. Al bizdiń azamattar sol 7 mln teńgeliik kóliktiń eki jylda aqshasyn qaitara almai, ne otbasyn asyrai almai, ne kreditin jaba almai júredi. Osyny eskeresizder me? Salyq komiteti bar, quqyq qorǵaý organdary bar, osyny qalai sheshýge bolady», - degen suraq qoidy qala turǵyny.
Almaty ákimi Erbolat Dosaev qazirgi tańda Kólik ministrligi jańa normalardy qarap jatqanyn aitty.
«Almatyda taksi máselesi úlken másele. Meniń jeke oiym - taksige litsenziia kerek. Litsenziia bolsa bizde kim júrgenin, qalai júrgenin túsinemiz. Yandex, InDriver degender agregatorlar. Olar burynǵy dispetcherlik pýnktter siiaqty. Olarǵa ótinish túsedi, olar ony ary qarai jiberedi.. Taksi degen kólik qoi. Oǵan normalar kerek. Ol qandai bolýy kerek, oǵan qalai monitoring jasaý kerek jáne taǵy basqa. Kólik ministrligine bul máseleler boiynsha usynystar túsken. Qazir ministrlik olardy zerttep jatyr. Aitý kerek, Almatyda tek qala emes, kórshi Almaty oblysynan kólikter aǵylyp keledi. Kún saiyn tańerteń qalaǵa 400 myń kólik kiredi. Jyl sońyna deiin tiisti zańnamalyq ózgerister qabyldansa, atalǵan máseleler sheshimin tabady dep senemin», - dedi Erbolat Dosaev.
