Almatyda sońǵy 2 táýlikte 51 adam koronavirýstan emdelip shyǵaryldy. Bul týraly qalalyq Qoǵamdyq densaýlyq saqtaý basqarmasynyń basshysy Tileýhan Ábildaev onlain brifing barysynda aitty, dep habarlaidy QazAqparat.
Basqarma basshysy osy ýaqytqa deiin Almatyda koronavirýstyq infektsiiadan 210 adam saýyǵyp emdeýden shyǵarylǵanyn aitty.
«Keshe jáne búgin statsionarlardan 51 adam emdeýden shyǵaryldy. Onyń 28-i adam virýsy bar naýqaspen bailanysta bolǵandar jáne 23-i meditsina qyzmetkeri. Prezidenttiń tapsyrmasy boiynsha meditsina qyzmetkerleriniń qaýipsizdigin qamtamasyz etý sharalary kúsheitildi», - dedi T.Ábildaev.
Búginde Almatyda 1940 tósek-orynǵa arnalǵan 9 juqpaly statsionar jumys isteidi, provizorlyq emdeýge jatqyzý úshin 909 tósek-orynǵa arnalǵan 12 statsionar, karantindik emdeýge jatqyzý úshin 1392 tósek-orynǵa arnalǵan 9 statsionar belgilendi.
Barlyq qalalyq juqpaly aýrýlar jáne provizorlyq aýrýhanalarda bólmelerdi «taza» jáne juqtyrylǵan aimaqtarǵa bólý qaǵidaty saqtalady. Barlyq meditsinalyq mekemelerde jeldetý jáne beinebaqylaý júiesi jumys isteidi. Jaýapty qyzmetkerler meditsina qyzmetkerleriniń jeke qorǵaný quraldaryn durys kiiý hattamasyn saqtaýyn qadaǵalaidy.
Jeke qorǵanys quraldaryn kiiý algoritmin saqtaý boiynsha turaqty sabaqtar ótkizilip jatyr.
