Foto: ashyq derekkóz
Almaty qalasynyń ákimi Darhan Satybaldy ýniversitet rektorlarymen kezdesý ótkizip, jańa oqý jylyna daiyndyq barysyn, jataqhana jaǵdaiyn jáne stýdentterdiń qala ómirine belsene aralasýyn talqylady, dep habarlaidy Ult.kz.
Ákim megapoliste 200 myńnan astam stýdent bilim alatynyn, bul – eldegi stýdentterdiń úshten birin quraitynyn aityp, olardyń ál-aýqaty men damýy úshin júieli qoldaý qajet ekenin atap ótti.
Qalada stýdentterge arnalǵan jataqhanalardyń jai-kúiin tekserý bastalyp ketti. Sonymen qatar, stýdentterge qoldaý kórsetý maqsatynda daǵdarys ortalyǵyn qurý jáne ótinishterge jedel jaýap beretin qalalyq ahýaldyq shtab ashý josparlanǵan.
Rektorlar bilim berý júiesin jańǵyrtý, kampýstar infraqurylymyn jaqsartý jáne jastardy ekologiialyq, qalalyq jobalarǵa tartý týraly usynystaryn jetkizdi. Almatynyń túrki álemi jastarynyń astanasy mártebesine sai mádeni-bilim berý is-sharalary ótetini de sóz boldy.
Darhan Satybaldy jastardyń belsendiligi men jaýapkershiligin arttyrý úshin osyndai birlesken jumystar qajet ekenin atap ótti.
