Almatyda ekinshi dúniejúzilik soǵys ardagerlerine 1 mln teńge kóleminde qarjylai kómek berý usynyldy. Mundai usynysty Almaty qalasy Áleýmettik ál-aýqat basqarmasynyń basshysy Názira Toǵyzbaeva qalalyq máslihatynyń kezekten tys IV sessiiasynda aitty, dep habarlaidy "Ult aqparat".
«Ekinshi dúniejúzilik soǵystaǵy Jeńistiń 76 jyldyǵyna orai soǵys ardagerlerine beriletin bir rettik tólem mólsherin 500 myńnan bir million teńgege deiin ulǵaitýdy usynamyz. Sondai-aq ekinshi dúniejúzilik soǵysy jyldarynda tylda eńbek etkenderge jáne qaitys bolǵan ekinshi dúniejúzilik soǵys múgedeginiń zaiybyna (jubaiyna) - 50 myń teńgeden tóleýdi usynymyz», - dedi Almaty qalasy Áleýmettik ál-aýqat basqarmasynyń basshysy Názira Toǵyzbaeva.
Máslihat depýtaty Kúpesbai Jampeiisov bul óte mańyzdy ekenin atap ótti.
«Almatyda tek 129 soǵys ardageri qaldy. Elbasy Nursultan Nazarbaev atap ótkendei: «Ardagerlerge degen maqtanysh pen qurmet ár qazaqstandyqtyń júreginde máńgi saqtalady». Qazaqstan soǵysta jeńiske jetý úshin aitarlyqtai úles qosqanyn bárimiz bilemiz. Men kún saiyn ardagerlermen sóilesemin, olar 76-jyldyq mereitoiyna bilik, máslihat olardy qalai baǵalaidy eken dep kútedi. Sondyqtan biz, máslihat depýtattary, million tóleý týraly sheshim qabyldaǵanymyzǵa óte qýanyshtymyn», - dedi ol.
