Almaty politsiiasy sintetikalyq esirtki tasymaldaý kanalyn áshkereledi, dep habarlaidy "Ult aqparat".
Qylmystyq topty 33 jastaǵy Túrksib aýdanynyń turǵyny basqarǵan.
«Ustalmas buryn kúdikti óziniń tanysyna 1 sirińkeniń qoraby kólemindei «alfa-PVP» psihotropty zatyn 40 myń teńgege satyp jibergen. Osy mámileden soń ol ustaldy. Arnaiy operatsiia Boraldai kóshesinde boldy. Odan ári turǵylyqty mekenjaiynda tintý júrgizildi. Nátijesinde peshtiń ishinen paket tabyldy. Onyń ishinen sur tústi untaq zatty birneshe paketke orap bólingen. Júrgizilgen himiialyq saraptamadan soń tárkilengen himiialyq zattardyń salmaǵy 1 keli 760 gramnan asatyny anyqtaldy», - dedi Almaty qalalyq politsiia departamenti basshysynyń orynbasary Berik Ábilbekov.
Tergeý tobynyń anyqtaǵanyndai, kúdikti qylmystyq piǵylyn júzege asyratyn kezde satyp alýshylarmen kezdespegen. Ol klientterge esirtkini jasyryp qaldyryp otyrǵan. Keiin aqshasyn elektrondy tólem júiesi arqyly alyp otyrǵan.
«Jaqyn arada bul sintetikalyq psihotropty zattardyń Almatyǵa jetý kanaly áshkerelenedi. Qazir kúdikti qamaýda otyr. Oǵan QR QK 297-babynyń 1-bólimimen, 287-babynyń 2-bólimimen aiyp taǵylǵan. Odan bólek kúdiktiniń úiinen «Strimer» markali travmatikalyq tapansha, qol granatasy, ańshy pyshaǵy tabyldy», - dedi podpolkovnik Ábilbekov.
Aita ketý kerek, munyń aldynda qalada jastar arasynda esirtki jarnamasy ashyq bannerlerde jariialanǵan bolatyn.
Keiin ákimshilik pen politsiia bul bannerlerdi demontajdady.
Mundai ashyq bannerler Óskemen, Shymkent, Astana, Qaraǵandy qalalarynda da ornalasqan.
Qalalyq politsiia departamentiniń Esirtki biznesine qarsy kúres basqarmasynan habarlaǵandai, «Narýjnaia reklama» JShS ókili QR ÁqbK 423-baby boiynsha ákimshilik jaýapkershilikke tartyldy. Bul bap boiynsha zańdy tulǵalarǵa 300 AEK kóleminde aiyppul qarastyrylǵan.
