Foto: Polisia.kz
"Sergek" intellektýaldy júiesi jaiaý júrginshiler ótkelderinde adamdardy elemeitin júrgizýshilerdi tirkeidi. Pilottyq joba Almatyda iske qosyldy, – dep habarlaidy Polisia.kz.
"Taldaý kórsetkendei, biylǵy 11 aida jol apatynan 556 jaiaý júrginshi qaza tapty, onyń 478-i jaiaý júrginshiler ótkelinde. Júrgizýshi tártibin arttyrý ólimmen aiaqtalǵan jol apattarynyń azaiýyna yqpal etedi", – deidi QR IIM ákimshilik politsiia komitetiniń erekshe tapsyrmalar jónindegi aǵa inspektory Aqtoty Boranova.
Zańbuzýshylyqtar QR ÁQBtK-niń 600-babyna sáikes (“Jaiaý júrginshilerdiń nemese jol qozǵalysynyń ózge de qatysýshylarynyń júrýine basymdyq bermeý”) tirkeledi.
Mysaly, eger avtokólik jaiaý júrginshiden keiin júrse, bul jol júrisi qaǵidasyn buzý bolyp sanalmaidy. Al eger júrgizýshi jaiaý júrginshige jol bermese jáne toqtamasa, oǵan aiyppul salynady. Eger jaiaý júrginshi de, kólik quraly da bir qiylysý aimaǵynda bolsa, bul ákimshilik quqyqbuzýshylyq bolyp tirkeledi.
"Bizdiń intellektýaldy júie jol júrisi qaǵidalaryn buzýdy tirkep qana qoimai, jol-kólik oqiǵalarynyń aldyn alyp, yqtimal qaýipti júrgizýshilerdi anyqtaidy. Jańashyldyqtardyń biri – jaiaý júrginshilerdi ótkizbeitin júrgizýshilerdi tirkeý", – dep atap ótti ázirleýshiler.
Sonymen qatar intellektýaldy júie pilottyq rejimde júrgizýshi men kólik quralynyń aldyńǵy oryndyqtarynyń jolaýshylarynda bekitilmegen qaýipsizdik beldigi siiaqty zańbuzýshylyqtardy tirkeidi.
