Demalys kúnderi Almaty qalasynyń eki aýdanynda Jambyl oblysy fermerleriniń qatysýymen keńeitilgen jármeńke ótedi, dep habarlaidy "Ult aqparat".
Megopoliste azyq-túlik beldeýin qurý jáne Jambyl oblysy men Almaty qalasy arasynda óńiraralyq yntymaqtastyqty damytý aiasynda 17-18 qazan kúnderi «Astana» ortalyq alańynda (Abylai han dańǵylynan Nazarbaev dańǵylyna deiin) jáne «Alataý» (Nurkent yqshamaýdany, 6) kontsert zalynyń janynda aýyl sharýashylyǵy ónimderiniń jármeńkesi ótedi.
Jambyl oblysy ónim óndirýshileri jármeńkege jalpy quny 162,1 mln teńgeni quraityn 360 tonnadan astam aýyl sharýashylyǵy ónimderin usynady.
Onyń ishinde 36 tonna et (jylqy, siyr, qoi eti jáne taýyq eti), 9 tonna shujyq ónimderi, 27 tonna sút ónimderi, 10 myń dana jumyrtqa, 3 tonna konditerlik ónimder men 9 tonna makaron ónimderi, 10 tonna qant, 4 tonna un, 1 tonna tuz, 5 tonna balyq, 11 tonna ósimdik maiy, 6,5 tonna bal, 1,0 tonna keptirilgen jemis jáne 82,3 tonna jemis-jidek pen kókónis ónimderi bar.
Jambyl oblysy ákimdiginiń habarlaýynsha, jármeńkede usynylatyn ónimderdiń baǵasy naryq baǵasynan 8-20 paiyz tómen bolady.
Aýyl sharýashylyǵy jármenkesi tańǵy 8:00-den keshki saǵat 17:00 deiin 2 kún boiy ótedi.
Aita keteiik, shara ótetin nysandarda sanitarlyq-epidemiologiialyq normalardy, onyń ishinde maska rejimin, qol gigienasyn jáne áleýmettik qashyqtyqty berik ustaný qatań talap etiledi.
