Almaty qalasy sanitarlyq-epidemiologiialyq baqylaý departamenti basshysynyń orynbasary Sádýaqas Baiǵabylov onlain brifing barysynda qazaqstandyq juldyzdar qatysqan toidyń videosyna qatysty pikir bildirdi, dep habarlaidy "Ult aqparat".
Video kadrlarynan mereke jas juptyń úilený toiyna arnalǵanyn kórýge bolady. Is-sharaǵa qatysýshylar arasynda Roza Rymbaeva, Sáken Maiǵaziev, Aidana Medenova bolǵan. Toida Sáken Maiǵaziev «Sáýirden bastap táýir kúnderimiz bastala bersinshi» degen tilek aitady.
«Bul videony tekserdik. Karantin talabyn buzý deregi anyqtaldy. Beinejazba zerttelýde, sodan keiin materialǵa zań turǵysynda baǵa beriledi. Bul adamdardy bárimiz bilemiz, tanimyz. Olardyń kópshiligi Almatyda turady. Eger buzýshylyq rastalsa, sharaǵa qatysýshylar ákimshilik jaýapkershilikke tartylady», - dedi Sádýaqas Baiǵabylov.
Aita keteiik, Almatyda jyl basynan beri karantin sharalaryn buzýshy 3 myńnan astam adamǵa 200 million teńgeden astam somaǵa aiyppul salyndy.
Jyl basynan beri 13 500-den astam nysan tekserildi, 1 573 ereje buzýshylyq anyqtaldy. Karantindi buzǵandarǵa qatysty 3018 hattama toltyryldy, aiyppuldyń jalpy somasy 202 million teńgeden asady.
Aita keteiik, monitoringtik toptardyń quramyna jergilikti politsiia qyzmetiniń ókilderi kiredi, olar basqa da zań buzýshylyqtar úshin hattamalar toltyrýǵa quqyly.
Monitoring toptary demalyssyz jáne mereke kúnderi de jumys isteidi.
Baiǵabylovtyń aitýynsha, karantin sharalaryn buzý faktileri qoǵamdyq tamaqtaný oryndary men dúkenderde jii tirkeledi.
