Almatyda politsiia qyzmetkeri qaladaǵy elitaly turǵyn úi keshenderiniń biriniń MIQ tóraǵasyna shabýyl jasady delingen video tarady, - dep habarlaidy Tengrinews.kz agenttigi.
Kozachkov offside Telegram-arnasynda eki adam arasyndaǵy tóbeles túsirilgen video jariialandy. Jazba sipattamasynda oqiǵa Mega Towers turǵyn úi kesheniniń MIQ (menshik ieleriniń qaýymdastyǵy) ǵimaratynda bolǵany týraly habarlanǵan.
"MIQ tóraǵasymen tóbelesken qara kiimdi er adam - Almaty Politsiia departamenti JQB (jeke qaýipsizdik basqarmasy - esk.) qyzmetkeri Raýan. Ol turǵyndardyń kúndelikti jalǵa beriletin eki páterge qatysty shaǵymdaryn sheshýge kelgen.
Olar politseidiki me, bilmeimin. Biraq turǵyndar bul páterlerde shý shyǵyp, janjal bolatynyn, biraq politseiler signaldarǵa múldem áreket etpeitinin aitady. Sosyn Raýan keldi", - delingen video sipattamasynda.
Almaty Politsiia departamenti jaǵdaiǵa qatysty pikir bildirdi, tóbeleske sebepker olardyń qyzmetkeri emes ekenin málimdedi.
"Videodaǵy adamnyń Almaty PD JQB jáne IIM JQD-ǵa esh qatysy joq. Onyń ishki ister organdaryna tiesiligi týraly aqparat shyndyqqa sáikes kelmeidi.
Osy rette elektron resýrs arqyly tóbeles deregi týraly aryz politsiiaǵa 12 jeltoqsanda túskenin habarlaimyz. Fakt boiynsha Bostandyq aýdandyq politsiia bólimi tergeý amaldaryn júrgizip jatyr. Basqa da mán-jailar anyqtalyp jatyr", - dedi PD baspasóz qyzmeti ókilderi.
Keiinirek Telegram-daǵy Kozachkov offside-arnasynda tóbelestiń taǵy bir videosy jariialandy.
Sondai-aq, Almaty PD JQB Raýan esimdi bir ǵana qyzmetker bar ekenin habarlady. Alaida Mega Towers-te MIQ tóraǵasymen tóbelesken ol emes. MQI qyzmetkerleri ony tanymaǵan.
