Almatylyq politsei aýǵan soǵysy ardageriniń ómirin saqtap qaldy, dep habarlaidy "Ult aqparat".
Demalys kúni «Jańa dáýir» aýylynda turatyn Qasenovter otbasy qonaqtarmen tańǵy as iship otyrǵan kezde kútpegen jaǵdai bolǵan. Úi iesi Qanat Qasenov ústel basynda esinen tanyp qalǵan. Sol sátte úige kelgen qonaqtyń biri ony aman alyp qaldy.
«8:30-da kúieýim ekeýmiz tańǵy asty isheiin dep otyrǵanbyz, sol kezde tanysymyz Sergei jáne onyń dosy keldi. Barlyǵy shai ishýge ústelge jaiǵasty. Bir kezde kúieýim Qanat tunshyǵyp qalǵandai bolyp, basyn artqa tastap, beti kógerip, kózderi ainala bastady. Barlyǵymyz eseńgirep qaldyq, men ne isterimdi bilmedim jáne qatty qoryqtym. Osy sátte Baýyrjan esimdi qonaǵymyz ornynan kúieýime jaqyndap, ústelden qasyqty alyp, aýzyna salyp, tilin shyǵaryp, tynys alý joldaryn bosatty. Sodan keiin onyń arqasynan ura bastady. Osyndai birneshe áreketten keiin Qanat qalpyna kele bastady. Kóp uzamai jedel járdem keldi, olar kúieýimdi tekserip, meditsinalyq kómek ýaqytynda kórsetilmegende bári qaiǵyly aiaqtalýy múmkin ekenin aitty», – deidi Qalipa Bekpasova.
Qanat Qasenovtyń týystary buǵan deiin mundai jaǵdai baiqalmaǵanyn aitty. 80-jyldardyń basynda Qanat Aýǵanstanda, Kandagar qalasynda qyzmet etken.
Internatsionalist jaýyngerdiń balasynyń aitýynsha, ákesi alkogol nemese ziiandy zattarǵa áýes emes.
«Eger Baýyrjan sol kúni bizdiń úige kelmegende, kúieýimniń aman qalýy ekitalai edi. Otbasymyzdyń atynan Baýyrjan Torǵaevqa kúieýimdi qutqarǵany úshin shyn júrekten alǵys aitamyz. Almaty qalasy politsiia departamentiniń basshylyǵyna júgine otyryp, biz Torǵaev Baýyrjan Bákenulyn laiyqty marapattaitynyna úmit artamyz. Onyń is-áreketinen biz ishki ister organdary qyzmetkeriniń jarqyn úlgisin kórdik, ol azamattardy qylmyskerlerden qorǵap qana qoimai, alǵashqy kómek kórsete aldy», – deidi Qanat Qasenovtiń jubaiy.
