Almatyda qazaq tilinen respýblikalyq baiqaý ótti. Dástúrli saiysta Qazaqstannyń túkpir-túkpirindegi joǵary oqý oryndarynda bilim alyp jatqan ózge ult ókilderi ózara baq synasty, dep habarlaidy "Ult aqparat".
Bul baiqaýdy Qazaq ulttyq qyzdar pedagogikalyq ýniversitetiniń Qazaq til biliminiń teoriiasy men ádistemesi kafedrasy qazaq tiliniń mártebesin kóterip, onyń qoldaný aiasyn arttyrý maqsatynda uiymdastyrdy.
Biylǵy saiys uly aqyn, oishyl Abai Qunanbaiulynyń 175 jyldyǵyna arnaldy. «Rýhani jańǵyrý» baǵdarlamasynda qarastyrylǵan basym baǵyttardy naqty iske asyrý turǵysynda qolǵa alynǵan baiqaý Zoom platformasynda ótti.
«Olimpiadanyń basty maqsaty – memlekettik tildiń qoldanylý aiasyn keńeitý, qazaqstandyq patriotizmdi qalyptastyrý, uly Abai ulaǵatyn jas urpaqqa dáripteý jáne jastardyń memlekettik tilge degen ynta-yqylasyn arttyrý. Osy ispettes igi ister qazaq tiliniń mártebesin kóterýge, ulttyq qundylyqtarymyzdy nasihattaýǵa, ózge tildi jastardyń qazaq tiline qurmet sezimin oiatýǵa yqpal etetini belgili», – dedi Qazaq til biliminiń teoriiasy men ádistemesi kafedrasynyń meńgerýshisi Tynyshtyq Ermekova.
Tórt kezeń boiynsha ótken saiys barysynda jiyrmadan astam stýdent ózara myqtyny anyqtady. Qatysýshylarǵa Almaty qalasy Tilderdi damytý jáne úilestirý jumystary bóliminiń basshysy Baqyt Qalymbet, ál-Farabi atyndaǵy Qazaq ulttyq ýniversitetiniń professory Anar Salqynbai, Súleiman Demirel atyndaǵy ýniversitettiń professory Shattyq Erǵojina, I. Jansúgirov atyndaǵy Jetisý memlekettik ýniversitetiniń dekany Aina Rahimova, Qazaq ulttyq qyzdar pedagogikalyq ýniversitetiniń Baspasóz jáne qoǵammen bailanys bóliminiń basshysy Jandar Asan jáne osy oqý ornynyń «Rýhani jańǵyrý» jobalyq keńsesiniń úilestirýshisi Gaýhar Baitasheva tórelik etti.
Olimpiada kezeńderinde Abai atyndaǵy Qazaq ulttyq pedagogikalyq ýniversiteti, L.N. Gýmilev atyndaǵy Eýraziia ulttyq ýniversiteti, Qyzdar ýniversiteti, Halyqaralyq aqparattyq tehnologiialar ýniversiteti, E.A. Bóketov atyndaǵy Qaraǵandy memlekettik ýniversiteti, M. Ótemisov atyndaǵy Batys Qazaqstan memlekettik ýniversiteti, Q. Jubanov atyndaǵy Aqtóbe óńirlik memlekettik ýniversiteti, Azamattyq aviatsiia akademiiasy jáne Ómirzaq Sultanǵazin atyndaǵy Qostanai memlekettik pedagogikalyq ýniversitetiniń stýdentteri óz ónerlerin ortaǵa saldy.
Olar «Sálem – sózdiń anasy» alǵashqy ainalymynda ózderin tanystyrsa, «Asyl sózdi izdeseń, Abaidy oqy, erinbe!» ekinshi kezeńinde hákim shyǵarmalaryn mánerlep jatqa oqyp jarysty. Al úshinshi týrda áleýmettik jelidegi óz paraqshalarynda «Memlekettik til – meniń tilim» taqyrybynda jazba jariialady. Sońǵy kezeńde adamzattyń danyshpanyna ainalǵan Abaidyń ómiri men shyǵarmashylyǵy boiynsha qurastyrylǵan test tapsyrmalaryn oryndady.
Qazylar qatysýshylardy baǵalaýda qazaqsha saýatty sóileýin, oiyn júieli jetkize bilýin jáne Abai ómiri men shyǵarmashylyǵy boiynsha bilim deńgeiin basty nazarǵa aldy.
«Úsh saǵatqa sozylǵan olimpiada barysynda qazaqsha erkin sóileitin, qazaq tili men ádebietin, Abai shyǵarmalaryn jan-tánimen súisine oqityn ózge ult ókilderiniń ynta-jigerine, ónerlerine riza boldyq. Baiqaý barysynda, uly oishyldyń sózimen aitqanda, «tolǵaýy toqsan qyzyl tildi» sóiletip, adam janyn tebirente oqylǵan óleńder men «kóńilge túrli oi salar» án-kúiler erekshe áserge bóledi desek artyq aitqanymyz emes. Osyndai jumystar arqyly olardyń qazaq tili boiynsha tanymdyq qabiletin damytyp, memlekettik tildi meńgerýine yqpal etýdi kózdeimiz. Olimpiada óskeleń urpaqty eljandy hám ulttyq qundylyqtar negizinde tárbieleýge zor úles qosady dep senemiz», – dedi qazylar alqasynyń músheleri.
Saiys sońynda qazylar alqasynyń tóraǵasy Baqyt Qalymbet Qyzdar ýniversitetinde osyndai ónegeli shara óz jalǵasyn taýyp kele jatqanyna rizashylyǵyn bildirip, memlekettik tildi erkin igergen búgingi stýdent jastar – erteńgi bilikti maman, táýelsiz Qazaq eliniń jarqyn bolashaǵy ekendigin aitty.
Baiqaý qorytyndysy boiynsha bas júldege Abai atyndaǵy Qazaq ulttyq pedagogikalyq ýniversitetiniń stýdenti D. Iýsýpova laiyq dep tanyldy. Birinshi oryndy M. Ótemisov atyndaǵy Batys Qazaqstan memlekettik ýniversitetiniń stýdenti V. Sýchkova ielense, ekinshi oryn Qazaq ulttyq qyzdar pedagogikalyq ýniversitetiniń stýdenti V. Artamonova men Abai atyndaǵy QazUPÝ stýdenti A. Bolovnevaǵa buiyrdy. Al Qyzdar ýniversitetiniń stýdenti R. Týrdimatova, E.A. Bóketov atyndaǵy QarMÝ stýdentteri Z. Kasimova men M. Kolmagarova úshinshi oryndy ózara bólisti.
Sonymen qatar «Memlekettik til nasihatshysy», «Abaitaný bilgiri», «Kórermender kózaiymy», «Eń úzdik post», «Kórkem sóz sheberi», «Shynaiy oidyń shynary», «Til bailyǵy», «Qazaq tiline qurmet», «Sóileý sheberi» nominatsiialary boiynsha jeńimpazdar anyqtalyp, olarǵa sertifikattar tabystaldy.
