Almatyda «Bolashaq» qaýymdastyǵy men «RazumLife» qoǵamdyq birlestiginiń bastamasymen otbasylyq festival ótti. Tórt júzge jýyq adam qatysqan erekshe shara otbasynyń árbir múshesine arnalǵan.
Festivaldiń hedlaineri – otbasylyq qarym-qatynas jónindegi maman, «Gýmandyq pedagogika halyqaralyq ortalyǵy» qoǵamdyq birlestikter qaýymdastyǵynyń vitse-prezidenti, álemge tanymal psiholog Marina Targakova. Ol «Otbasyndaǵy beibitshilik formýlasy» taqyrybynda dáris oqyp, renish seziminen qalai qutylyp jáne erkin ómir súrýge bolady; adam balasy otbasynda ózin qalai ustaý kerek jáne nekede berik qarym-qatynas qurý úshin ne isteý kerek; otbasyna, dostyqqa jáne óz ortasyna degen súiispenshilikti qalai sińirý kerek; ómirdegi ár salanyń qaisysy basymyraq, qaisysyn ekinshi orynǵa qoiýǵa bolady jáne ómirińizdiń qandai bóligine kóbirek kóńil bólý kerek degen suraqtarǵa jaýap berdi.
Biznes-jattyqtyrýshy jáne «Jańa urpaq» kóshbasshylyq mektebiniń negizin qalaýshy Ashat Ábjanov ata-analarǵa ár balanyń kóshbasshy ekenin umytpaýǵa keńes berdi. Ol balanyń týabitti kóshbasshylyq qasietteri týraly aityp, balalar filosofiiasynyń qupiialaryn ashty.
«Transformatsiia» Áielder densaýlyǵy mektebiniń negizin qalaýshy Almira Orlova búkil otbasy úshin durys tamaqtaný, taǵamdy taldap jeý jáne biologiialyq belsendi qospalar qanshalyqty paidaly, etsiz ómir súrý syndy suraqtarǵa jaýap berdi.
Otbasylyq fotograf Janna Káribaeva ómirdiń árbir sátin saqtap qalý mańyzdy dep sanaidy. «Jylylyq pen sáýleli mezetterdi beineleitin sýretterdi jinap, otbasylyq oqiǵalar muraǵatyn jinaý óte qyzyqty» dep atap ótti Janna. Ol «Fotomama» jobasy, ádemi fotosýret túsirýdiń qupiiasy týraly aityp berdi.
Ashyq aspan astynda ótken festival qonaqtary túrli sheberlik sabaqtary, balalar men eresekterge, áielder men erlerge arnalǵan jeke baǵdarlama, kreativti fotosessiia, qolónershiler jármeńkesi, otbasy, densaýlyq jáne tárbie taqyrybynda shaǵyn dárister tyńdap, taza aýada dámdi taǵamdardan aýyz tiip qaitty. Óte qyzyqty ári paidaly baǵdarlama barlyq qatysýshylardyń kóńilinen shyqty.
