Almatylyq 13 jasar mektep oqýshylary tóbelesip, onyń bireýi aýrýhanaǵa tústi, dep habarlaidy QazAqparat.
Jasósipirimder arasyndaǵy janjal 3 qyrkúiek kúni keshki saǵat 19:00-de bolǵan. Medeý aýdanynda ornalasqan №100 mekteptiń oqýshylary sabaqtan keiin ózara kúsh synaspaq bolǵan.
«BAQ ókilderi taiaq jegen balanyń ata-anasynyń sózi boiynsha aqparat taratyp jatyr. Birinshiden, oqýshylar sabaq bitkennen keiin tóbelesken. Bireýiniń aty jóni - Aleksandr Vodnikov. Osy mekteptiń burynǵy oqýshysy. Osydan bir jyl buryn sport mektebine aýysyp ketken. Alaida, biyl óziniń synybyna qaityp keldi. Ekinshi oqýshy - Rýstam Býharov. Synyptastar sabaqtan keiin ózara kúsh synaspaq bolypty. Qastarynda taǵy eki synyptasy boldy. Solardyń aitýynsha, Rýstam Aleksandrdy iterip jibergen. Jerge qulaǵan Aleksandr orynynan atyp turyp, Rýstamnyń jaǵynan uryp jibergen. Ol jerde Rýstamǵa eshkim jabylǵan joq. Sodan keiin, bári úilerine qaitqan. Aleksandr Vodnikov «jetim» bala, ol qamqorshysynyń qolynda tárbielenip jatyr», - deidi Medeý aýdandyq bilim bóliminiń basshysy Aǵaisha Saparova.
Aǵaisha Saparovanyń aitýynsha, Rýstam Býharovty ata-anasy №5 qalalyq klinikalyq aýrýhanaǵa (jaq jáne bet LOR-hirýrgiiasy) aparǵan. Qolymyzda jaraqaty aýyr emes degen anyqtama bar.
Sondai-aq, Almaty qalalyq Qoǵamdyq densaýlyq saqtaý departamenti zardap shekken oqýshynyń jaǵdaiy týraly aitty.
«Bala neirohirýrgiia bóliminde jatyr. Diagnoz: jabyq bas mi jaraqaty, midyń shaiqalýy, jaǵdaiy ortasha aýyr dep baǵalanady. Emdeý sharalary júrgizilip jatyr», - dep habarlady Densaýlyq saqtaý basqarmasy.
