Almatydaǵy №5 qalalyq emhananyń jalpy tájiribe dárigeri Laýra Maldybaeva naýqastardy onlain rejimde qabyldaý jáne keńes berý jalǵasatynyn aitty, dep habarlaidy "Ult aqparat".
Onyń aitýynsha, qaladaǵy emhanalarda onlain-keńes berý maýsym aiynan bastap iske qosylǵan. Eki jarym aidyń ishinde №5 emhanada 3 myńnan astam onlain-keńes berildi. Habarlasqan naýqastar ásirese dene qyzýynyń kóterilýine, basynyń, keýde tusynyń aýyrýyna, diareiaǵa shaǵymdanǵan.
«Halyqtyń qaýipsizdigi úshin emhanalarǵa kelý shekteldi. Jergilikti dárigerler óz naýqastarymen internet arqyly bailanys ornatty. Tipti, naýqastarǵa tegin dári-dármekti úilerine deiin jetkizip berýde», – dedi Laýra Maldybaeva onlain-brifing barysynda.
Sonymen qatar, ol qazir karantin sharalary jeńildetilip jatqanymen, saqtyq sharalaryn áli de qatań ustaný kerektigin tilge tiek etti.
«Maska taǵyp, áleýmettik qashyqtyqty saqtaý qajet. Odan bólek, 65 jastan asqan adamdarǵa kóshege shyǵýǵa jáne emhanaǵa barýǵa áli de shekteý bar. Olar emhanadan onlain keńes ala alady», – deidi Laýra Maldybaeva.
