Almatyda kópqabatty úidiń qabyrǵasynda Muqaǵali Maqataev beinelengen mýral paida boldy, dep habarlaidy QazAqparat tilshisi.
Aqiyq aqyn beinelengen alyp kartina Sháripov pen Maqataev kósheleriniń qilysynda ornalasqan úilerdiń biriniń qabyrǵasyna salyndy. Mýral Sh. Aimanov atyndaǵy «Qazaqfilm» kinostýdiiasynyń tapsyrysy boiynsha salyndy.
«Jaqynda «Muqaǵali» filmi ulttyq prokatqa shyqty. Búgin bárimiz aqynnyń qurmetine salynǵan qabyrǵa sýretiniń ashylý saltanatyna jinaldyq. Aqyn beinelengen mýral qala turǵyndarynyń kóńilinen shyǵady dep senemiz. Biz sondai-aq basqa da belgili tulǵalarymyzǵa mýral arnaý ideiasyn qoldaýdy jalǵastyramyz», - dedi Aimanov atyndaǵy «Qazaqfilm» kinostýdiiasynyń vitse-prezidenti Aidarhan Ádilbaev.
Sharaǵa aqynnyń týystary qatysty.
«Búgin erekshe kún. Qalamyzda aqyn Muqaǵali Maqataevqa arnalǵan úlken mýral paida boldy. Bul úshin «Qazaqfilm» kinostýdiiasyna alǵys aitqym keledi. Jaqynda ol týraly alǵashqy kórkem film jaryqqa shyqty. Muqaǵali Maqataevtyń 90 jyldyǵyn toilaý aiaqtalýǵa jaqyn qaldy. Jýyrda Almaty oblysy, Raiymbek aýdanynyń ortalyǵynda eskertkish ornatyldy. Aldaǵy ýaqytta oǵan arnalǵan sharanyń bári osyndai joǵary deńgeide ótedi dep senemiz», – deidi Muqaǵali Maqataevanyń kelini Baqytgúl Aidarova.
Mýraldy Abai Sultan jáne Nurbolat Amanqul esimdi jas sýretshiler salyp shyqty.
«Muqaǵali Maqataeva syndy kórnekti tulǵanyń sýretin salý biz úshin úlken mártebe. Ony bizge senip tapsyrǵandaryna qýanyshtymyz. Bizdiń týyndymyz barlyǵyna unaidy dep oilaimyn. Mýraldyń kólemi 190 sharshy metr. Ony salýǵa bes kún ketti», - deidi sýretshi.
