Foto: Almaty.tv
Almatyda «Mereili otbasy» ulttyq baiqaýynyń jeńimpazdary anyqtaldy. Respýblikalyq konkýrstyń qalalyq kezeńinde úzdik atanǵandar saltanatty túrde marapattaldy. Otbasylar dodasy biyl da jyl saiynǵy dástúr boiynsha Halyqaralyq otbasy kúnine orai 15 mamyr kúni bastalǵan edi, dep habarlaidy Almaty.tv.
Mereili otbasy atanyp, respýblikalyq kezeńge joldama alǵan – Sybanbekovter otbasy. Bolat Qýanyshbekuly men Sana Shaihanqyzy – kópbalaly ata-ana. Olar otbasylyq kásippen ainalysady. Qaiyrymdy áýlet kóp jyldan beri jaǵdaiy tómen januialarǵa kómek qolyn sozady. «Mektepke jol» aktsiiasy aiasynda jylda 300-den astam balany mektep formasy, oqýǵa qajet quraldarmen qamtamasyz etedi. Mereili otbasynda «qaiyrymdylyq júrekti nurlandyrady, ómirge mán darytady» degen jazylmaǵan qaǵida saqtalǵan.
"Óz basym mundai konkýrsqa birinshi ret kelip otyrmyn. Al Sybanbekovter otbasy birneshe konkýrsqa qatysyp, jeńimpaz atanǵan. Bul jolǵy saiys ta jaqsy ótti", – deidi qala turǵyny Zaira Boshanova.
Ulttyq baiqaýǵa qatysýǵa ótinimder mamyr-shilde ailarynda qabyldanǵan. Biyl 232 otbasy konkýrsqa qatysýǵa niet bildirgen. Aldymen aýdandyq komissiianyń qaraýynan ótip, qalalyq kezeńge 16 áýlet joldama alǵan. Sybanbekovter otbasynan bólek, aýdanaralyq kezeńde mereii ústem bolǵan otbasylar da marapattaldy.
"Respýblikalyq konkýrsqa qatysqan kezde ózin kórsete alatyn, jetken jetistikteri mol, urpaǵyna tamasha tálim-tárbie bergen, olardyń ómirde óz ornyn tabýǵa yqpal etken jáne sonyń igiligin eli de, ata-ananyń ózi de kórip otyrǵan januianyń ozyp shyǵýy bárimizdi qýantýy kerek", – dedi Qazaqstannyń Eńbek eri Aiagúl Mirazova.
Komissiia quramynda qala ákimi men orynbasary, birneshe basqarma basshysy, sondai-aq úkimettik emes uiymdardyń ókilderi, máslihat depýtattary jáne qalanyń qurmetti azamattary boldy.
"Qalalyq komissiia jeńimpazdardy anyqtaýda mynadai kriteriilerge basa nazar aýdardy. Olar otbasynyń jetistigi, otbasynyń bos ýaqytta nemen ainalysatyny, qoǵamdyq jumysqa aralasýy, jádigerleri, otbasy qyzyǵýshylyǵy", – deidi Qoǵamdyq damý basqarmasynyń bas mamany Aqbota Sadyq.
Qoǵam nazaryn otbasylyq qundylyqtardy saqtaýǵa aýdaryp, ony dáripteý maqsatynda elimizde ár jyl saiyn «Mereili otbasy» ulttyq baiqaýyn ótkizý dástúrge ainalǵan. Biyl Respýblika kólemindegi konkýrstyń bastaý alǵanyna 10 jyl boldy.
