Almatyda Tóle bi men Masanchi kósheleri qiylysyndaǵy saiabaqqa 30 túp mamyrgúl butaǵy otyrǵyzyldy, dep habarlaidy QazAqparat.
«Qazaqstanǵa arnalǵan aǵashtar» jobasy aiasynda «Izgi ister marafony» ulttyq jobasy men Áleýmettik mańyzy bar bastamalardy damytý qory Almatydaǵy Tóle bi men Masanchi kósheleri qiylysyndaǵy saiabaqqa 30 túp mamyrgúl butaǵyn otyrǵyzdy.
Uiymdastyrýshylardyń aitýynsha, aktsiia meditsina qyzmetkerleriniń qurmetine arnalǵan.
«Bul jer aldaǵy ýaqytta mamyrgúl parkine ainalady. Bul aktsiiany koronavirýspen kúresken barlyq meditsina qyzmetkerlerine arnadyq. Munda mamyrgúldiń «meiera» tuqymy otyrǵyzyldy. Bul joba elimizdiń basqa da óńirlerinde qolǵa alynǵan. Qazir tórt joba Nur-Sultan qalasy boiynsha júzege asyrylyp jatyr. Atap aitar bolsam, «Ustaz alańy», «Meditsina qyzmetkerleriniń skveri», «8 naýryz alleiasy» jáne «Naýryz» alleiasy. Jobanyń maqsaty – ár qazaqstandyqty elimizdi kógaldandyrýǵa jumyldyrý», - deidi Qoǵamdyq mańyzy bar bastamalardy damytý qorynyń ókili Dina Daniiarova.
Jobanyń barlyq qatysýshylarynyń maqsaty – Ekoparkti qurý ǵana emes, sonymen birge, onyń sapasyn qoldaý jáne odan ári belsendi damytý.
«Biz únemi eleýmettik jobalarǵa qoldaý kórsetemiz. Bizdiń maqsatymyz – adamdarǵa qýanysh syilaý, basqalarǵa úlgi kórsetý. Aldaǵy ýaqytta bul saiabaq qalalyqtardyń súiikti ornyna ainalady dep oilaimyz», - dedi «Kórkem telekom» JShS direktory Áset Ahmetov.
Aitylyp ótkendei, aktsiiaǵa qatysqandar barlyq sanitarlyq talapty saqtady.
