Almaty ákimi Baqytjan Saǵyntaev turaqty ekotýrizmdi damytý sharalary aiasynda qurylǵan jańa týristik nysanmen tanysty, dep habarlaidy QazAqparat.
Jeke investor júzege asyrǵan joba – qoǵamdyq tamaqtandyrý pýnkti, týristik qural-jabdyqtar dúkeni bar týristik aqparattyq ortalyq.
Vizit-ortalyqta «Ile-Alataý» ulttyq parki týraly barlyq qajetti aqparatty alýǵa bolady, ol úshin Visit Almaty infostoikasy ornatylǵan, konsýltanttar jumys isteidi. Munda týristik baǵyttar, soqpaqtar týraly derekter, ulttyq park aýmaǵyndaǵy obektilerdiń bailanystary jáne qaýipsiz jáne jaily týrizm úshin qajetti jabdyqtar usynylady.
«Biz Táýelsizdik kúni siiaqty tamasha merekede vizit-ortalyqty ashýǵa qýanyshtymyz. Bógetke barar jolda biz demalýshylar úshin 15 oryndyq ornattyq. Sondai-aq, jaiaý júrginshiler aimaǵyn abattandyratyn bolamyz», - dedi «Taý Jol Shymbulaq» JShS basshysy Sergei Spitsyn.
«Medeý» BSK vizit-ortalyǵy jalpy alańy 208 sharshy metr aýmaqta ornalasqan, investitsiia kólemi – 100 mln teńge, 50 jumys orny qurylady.
Taýlarda qaýipsiz jáne jaily bolýdy qamtamasyz etý maqsatynda Tuiyq-sý shatqalynda tikushaq alańynyń qurylysy júrgizilýde. Budan basqa, spýtnik bailanysy jáne SOS dabyl túimeleri bar taýly marshrýttardyń shalǵai toraptyq ýchaskelerinde 15 qutqarý úishigi ornatyldy.
2 arnaiy baqylaý-qutqarý pýnkti daiyndaldy. Olar taýly jerlerde ornalasqan. Onda16 adamnan turatyn qutqarýshy táýlik boiy kezekshilik jasaidy. Qimasar shatqalynda dabyl túimelerin baqylaý júiesiniń pilottyq jobasy iske qosyldy.
Búginde taýly jerlerde 1000 shaqyrymnan astam jaiaý júrý marshrýttary tsifrlandyryldy, olardyń 500 shaqyrymy abattandyryldy. Barlyǵy 2GIS jáne ViewRanger platformalarynda qoljetimdi. Bul marshrýttarda QR-kodtary bar stendterdi qosa alǵanda, barlyq qajetti aqparattyq derekter ornatylǵan, onda týrister marshrýttyń kúrdeliligimen, onyń uzaqtyǵymen jáne ótý ýaqytymen tanysa alady.
Budan basqa, Úlken jáne Kishi Almaty shatqaldarynda aǵymdaǵy jyldyń sońyna deiin jalpy uzyndyǵy 179 shaqyrym bolatyn taý marshrýttaryn abattandyrýdy aiaqtaý josparlanýda. Sondai-aq Gorelnik, Prosveshenets, Qyzylsai, Kazachka jáne «Lýnnaia» alańqaiynda 6 kemping-aimaq qurý boiynsha jumys júrgizilip jatyr.
