Qazaqstandyq tanymal ánshi Mádina Sádýaqasova Almaty qalasynda jol apatyna tústi. Ánshiniń avtomobiline qoǵamdyq kólik kelip soǵylǵan. Aitýynsha, ózi din aman, tek betine zaqym kelgen. Sondai-aq, avtobýsta otyrǵan eki azamat japa shekken, dep habarlaidy Sputnik.
Jol-kólik apaty 23 qazan kúni bolǵan. Onyń naqty qalai bolǵanyn jáne kim kináli ekenin ánshiniń ózi baiandap berdi.
"Aldyńǵy kúni kólik aidap kele jatyp oqýshylardy ótkizip jiberý úshin jaiaý júrginshiler jolaǵyna kelip toqtadym. Kenet kóligime úlken avtobýs soǵyldy. Soqqydan keiin pysyq balalar jol patrýl qyzmetin, jedel járdemdi shaqyryp, meniń janyma júgirip kelip, sý men ózderiniń telefon nómirin usyndy. Artynsha sabaqtaryna júgirip ketti. Qudai saqtady. Júrgizýshi ata qatty qobaljyp ketti. Jolaýshyǵa qaraimyn dep toqtap úlgermei qalǵanyn aityp aqtaldy. Avtobýsta bir qyzdyń beti qanǵa boialyp, esin durys bilmei turdy. 103 nómirine habarlasqanymda maǵan kóp suraq qoidy. Keiin "Rasymen de, dáriger kómegi qajet pe degen suraqty qoiý úshin" ol qyzdyń nómirin surady", — dedi Mádina Sádýaqasova.
Ári qarai ánshi sol kúni ózi jedel járdem shaqyrý úshin habarlasqan dispetcher qyzmetine qatty ashýy kelgenin jetkizdi. Aitýynsha, orynsyz suraqtar qoiyp, tipti, birden kómekke kelýden bas tartqan. Ánshi dispetcher qyzmetine renjise de, jedel kómek kórsetip, qol ushyn sozǵan inspektorǵa alǵys aitty.
"Kelesi sózderim 23.10.2018 jyly saǵat 13:25 kezinde habarlasqan 103 dispetcherine arnalady. Men sizderge jol-kólik oqiǵasy týraly, qyzdyń qansyrap jatqany, jasy, esimi, "Dostyq-Shevchenko" kóshesi dep apat bolǵan mekenjaidy aittym. Biraq tutqanyń ar jaǵynan "Siz úsh aiýdy kórip tursyz ba?" jáne "Ol qyzdyń nómirin berińiz, biz ózimiz habarlasamyz" degen sózderdi estigen kezde qatty ashýlandym. Keiin sizdermen áńgimeni jol patrýldik qyzmet inspektory jalǵastyrdy. Olarǵa jyldam jumystary úshin alǵysym sheksiz", — dedi ol.
Dispetcher men ánshiniń dialogyna inspektor aralasqannan keiin jedel járdem qyzmeti oqiǵa ornyna jyldam kelgen. Avtobýsta otyrǵan eki adam jaraqat alǵan. Sóz sońynda ánshi dispetcher qyzmetinen bólek, avtobýs júrgizýshilerine degen renishin jetkizdi. Olarǵa asyqpai, ózderine tiesili jolmen júrýge keńes berdi. Munymen qatar, betine zaqym kelgenin aityp ótti.
"Boijetken, jedel járdemniń dispetcheri, bireýdiń ómiri sizdiń qolyńyzda turǵan bolýy múmkin. Al siz orynsyz saýaldar qoiyp, baiaý sóilep tursyz! Aqyry kelip, Jansaiany aýrýhanaǵa alyp ketken jedel járdem qyzmetkerlerine rahmet. Onyń jáne taǵy bir avtobýsta otyryp japa shekken azamattyń jaǵdaiy jaqsy bolady degen úmittemin.
Avtobýs júrgizýshilerine: Qudai-aý, qaida sonsha asyǵasyzdar?! Eń bolmasa, ózińizge tiesili jolmen rahattanyp júrmeisiz be? Jolaýshylarǵa aitarym — júrgizýshilerdiń mazasyn almańyzdar. Al men bolsam amanmyn, shúkir. Belbeý taqqannyń ózinde betime sál zaqym keldi. Sol kúni jaqsy siiaqty edi, búgin qorqynyshty bolyp tur.
Eń bastysy, bári aman. Bet jazylar, osyndai bolyp qalmaityn shyǵar. Temir jasalady, bári umytylady. Árine, bas aman bolsyn! Bir-birimizge meiirimdi bolaiyq, aǵaiyn!" — dedi ánshi.
