Almatyda arnaiy operatsiia barysynda lombardtan quny 40 million teńgeden asatyn zergerlik buiymdardy urlaǵan kúdikti ustaldy, dep habarlaidy QazAqparat.
«11 qyrkúiekte Almaty oblysy Qarasai aýdandyq politsiia basqarmasynyń kezekshi bólimine Qaskeleń qalasynyń 54 jastaǵy turǵyny urlyq jasalǵany týraly aryz túsirdi. Ol lombardtan jalpy quny 40 million teńgeniń zergerlik buiymdary urlanǵanyn aitty. Jábirlenýshniń sózinshe, ury ishke qabyrǵany buzyp kirgen», - dep habarlady Almaty oblystyq politsiia departamentiniń baspasóz qyzmetinen.
Atalǵan fakt QR Qylmystyq kodekstiń 188-baby 3-bóligi boiynsha tirkeldi.
Arnaiy uiymdastyrylǵan jedel-izdestirý sharasy barysynda Almaty oblysy IID kriminaldyq politsiia basqarmasynyń qyzmetkerleri urlyq jasaǵany úshin birneshe ret sottalǵan 36 jastaǵy kúdiktini anyqtady.
Ol - Ekibastuz qalasynyń týmasy.
Er adam jaldamaly páterlerde turyp, mekenjaiyn jii aýystyrǵan.
«Almatyda arnaiy jasaq sarbazdarynyń qatysýymen júrgizilgen operatsiia barysynda 6 qarasha kúni kúdikti ustalyp, ýaqytsha ustaý izoliatoryna qamaldy. Er adam urlyq jasaǵanyn moiyndady. Ol lombardqa dabyldy óshirip, arnaiy qurylǵynyń kómegimen qabyrǵany buzyp kirgenin aitty»,- dep atap ótti vedomstvadan.
Ol urlanǵan zergerlik buiymdardy alypsatarlarǵa ótkizgen.
Túsken aqshaǵa kepilde turǵan áieliniń kóligi men ózine sý jańa qymbat kólik satyp alǵany belgili boldy.
