Almatyda kúzgi aǵash egý naýqany bastaldy. Bul týraly onlain brifing barysynda Almaty qalalyq jasyl ekonomika basqarmasynyń basshysy Natalia Livinskaia málim etti, dep habarlaidy QazAqparati.
Onyń aitýynsha, Almaty syndy alyp shahardyń kórkin keltirýde, ásirese aýa tazalyǵyn saqtaý úshin jasyl jelektiń orny erekshe. Sondyqtan, kóktem jáne kúz mezgilinde aǵash otyrǵyzý naýqany júrgiziledi.
«Búginnen bastap biz kúzgi kóshet otyrǵyzýǵa kiristik. Olar osy jyldyń 20 qarashasyna deiin sozylady. Shamamen 290 myń kóshet otyrǵyzý josparlanýda. Kóshet otyrǵyzý kóbine Alataý, Naýryzbai, Jetisý aýdandarynda júrgiziledi. Barlyq tilek bildirýshiler jasyl jelekterdi otyrǵyzýǵa qatysa alady. Kóshet otyrǵyzý kestesimen basqarmanyń resmi saitynda tanysa alasyzdar. Jalpy, 3 jyl ishinde shamamen 1 mln jasyl jelek otyrǵyzylady»,– dedi ol.
Sonymen qatar, spiker kóshet otyrǵyzýdyń negizgi talaptaryn atap ótti.
«Biiktigi keminde 3 metr, 5 qalyptasqan butaqtary bar, 6-8 jastaǵy, oqpany tegis, diametri 3 sm, kútimi kem degende 2 jyl bolǵan aǵashtardy otyrǵyzýǵa ruqsat etiledi. Aǵashtyń túrin aimaqtyń klimaty pen topyraǵynda bailanysty anyqtaý kerek»,– dedi Natalia Livinskaia.
