Almatyda kúzde COVID-19 juqtyrǵan 7 700 patsientke oryn daiyndalyp jatyr. Bul týraly búgin Almaty telearnasy arqyly tikelei efirden qala ákimi Baqytjan Saǵyntaev aitty, dep habarlaidy "Ult aqparat".
Bul kúzgi-qysqy kezeń bastalǵanǵa deiin qosymsha tósek-oryndarǵa qajettilik ósken jaǵdaida aldyn-ala jasalady. Belgili bolǵandai, pandemiiany toqtatýdyń eń tiimdi eki joly bar – bul qoldanystaǵy shekteý sharalary jáne tósek-oryn sanyn arttyrý.
Pandemiia bastalǵaly beri infektsiialyq statsionarlardyń sany 2-den 26-ǵa deiin (500 tósek-orynnan 6 096 deiin) ósti. Kúzde COVID-19 simptomdary bar 7 700 patsientke statsionarlyq emdeýdi bir mezgilde qamtamasyz etý josparlanyp otyr.
«Aldaǵy kúnderi jańa COVID-19 statsionarlary ashylady. Olardy aldyn-ala sanitarlyq-epidemiologiialyq aýditten ótken, densaýlyq saqtaý obektileriniń bazasynda ashamyz. Qazirgi ýaqytta jaýapty mamandar qurylys jumysyn júrgizip jatyr. Olardyń ishinde 250 orynǵa shaqtalǵan «Qazaqstan», 376 oryndyq «Kóktem», 140 oryndyq «Samal» pansionaty, 230 oryndyq «Astana» qonaq úii, 360 oryndyq QazATK jataqhanasy, 100 oryndyq UOS múgedekterine arnalǵan respýblikalyq klinikalyq gospital, 500 orynǵa shaqtalǵan Arnaýly áleýmettik qyzmet kórsetý ortalyǵy bar. Bul jańa statsionarlar jumys istep turǵan nysandarǵa qosymsha tamyz aiynyń sońyna deiin kezeń-kezeńimen iske qosylatyn bolady», - dedi B.Saǵyntaev.
Sonymen qatar ákimdik ana men balanyń densaýlyǵyn qorǵaýǵa erekshe kóńil bóledi. Barlyq áiel-ananyń búgingidei pandemiia kezeńinde qaýipsiz jaǵdaida bosanýy, bosanǵanǵa deiin jáne bosanǵannan keiin de úzdiksiz kútimde bolýy asa mańyzdy.
Qalada 45 tósek-oryndy №4 perzenthana jumys isteidi. Jaqyn arada osy perzenthananyń 60 tósek-orynǵa arnalǵan jańa korpýsy iske qosylady. Sonda mundaǵy jalpy oryn sany 105-ke jetedi.
Patsientterdi shuǵyl ornalastyrý úshin ýaqytsha statsionarlar bolý múmkindigi bar degen obektilerge kúndelikti monitoring júrgiziledi.
«Búgingi tańda biz buǵan deiin eshqashan jasalmaǵan sharalardy qolǵa aldyq. Shuǵyl ári óte qysqa merzimde aýqymdy jańa statsionarlar ashyp, olardy qajetti barlyq tehnikamen jabdyqtaýdamyz. Ǵimarattardyń bólmelerin qaita josparlap, shliýzder men oqshaýlanǵan bokstar qurylýda. Barlyq deńgeidegi meditsinalyq kómek kórsetýdiń tiimdiligin arttyrý úshin densaýlyq saqtaý júiesine ózgerister engizýdemiz», - dedi qala ákimi.
