Foto: Kókil mektebiniń baspasóz qyzmetinen
Almatyda kúishi kompozitor Qazanǵap Tilepbergenulynyń bai mýzykalyq murasyn óskeleń urpaqqa nasihattaý maqsatynda, tuńǵysh ret «Kúi tóresi Qazanǵap» atty dombyrashylar baiqaýy ótip jatyr, dep habarlaidy Ult.kz.
Qurmanǵazy atyndaǵy Qazaq ulttyq Konservatoriiasynyń 80 jyldyǵy jáne kúishi-kompozitor Qazanǵaptyń 170 jyldyq mereitoiyna arnalǵan I-qalalyq dombyrashylar baiqaýyn Qurmanǵazy atyndaǵy Qazaq ulttyq Konservatoriiasy, Dombyra kafedrasy jáne «Kókil» mektep-kolledji uiymdastyrǵan.
Sońǵy zertteýlerdiń nátijesinde Qazanǵaptyń buryn sońdy oryndalmaǵan kóptegen kúileri notaǵa túsip, kúishilerdiń repertýarlarynan oryn alyp júr. Qazirgi tanda Qazanǵaptyń 79 kúii hattalyp, mýzykalyq oqý oryndarynda repertýar retinde usynylyp otyr.
«Almaty jurtshylyǵy úshin, Almaty qalasy úshin búgin úlken oqiǵa. Aldmatyda tuńǵysh ret birinshi qalalyq Qazanǵap Tilepbergenuly atyndaǵy dombyrashylar saiysy uiymdastyrylyp jatyr. Ish-sharanyń basty maqsaty, sońǵy kezde biz qazanǵaptyń murasyn zerttep, 30-40 jyl boiy el arasynan kóptegen kúilerin, kóptegen úntaspalaryn Mańǵystaý, Aqtóbe oblystarymen qatar, Qaraqalpaqstan, Túrkimenstan, Ózbekstan elderin aralap, Qazanǵaptyń kózin kórgen kóptegen aqsaqaldardyń áńgimelerin, kúilerin jazyp, osydan 1-2 jyl buryn «Kúi tóresi Qazanǵap» atty 3 tomdyq kúilerińn shyǵardyq. Ol jerde Qazanǵaptyń 79 kúii notaǵa túsip, repertýarǵa engizýge úlken bir septigin tigizdi. Iaǵni Qazanǵaptyń mol murasy jinaldy deýge bolady. Sol Qazanǵaptyń shákirtteriniń izimen júrdik. Áńgimeleri, kúilerdiń shyǵý tarihyn bárin tyńdadyq. Onyń taǵdyry da qazaq tarihymen bailanysty. Qazanǵap dúniege kelgende Eset Kótibaruly bastaǵan birinshi ult-azattyq kóterilisi bolǵan, oǵan arnaǵan Qazanǵaptyń 3-4 kúii bar.
Al búgingi baiqaýdyń bas júldesine 600 myń teńge jáne árbir kezeńge qarai 12 oryn belgilep otyrmyz», – deidi «Kókil» mektebiniń direktory Abdýlhamit Raiymbergenov.
Foto: Kókil mektebiniń baspasóz qyzmetinen
Baiqaý 2 kezeńnen ótedi. Ár kezeńde Qazanǵaptyń buryn sońdy oryndalmaǵan týyndylary bar. Baikaýda Almaty qalasynyń joǵary jáne orta mýzykalyq oký oryndarymen kosa arnaiy mamandandyrylǵan mýzyka mektepteriniń oqýshylary qatysyp jatyr.
«Men qazir Almaty qalasyndaǵy Qurmanǵazy atyndaǵy Ulttyq kontservatoriiasynyń 4 kýrs stýdentimin. Búgingi Qazanǵap konkýrsyna birinshi týrǵa Qazanǵaptyń «Qońyr Aqjeleń», «Dúrkin-dúrkin» jáne tańdaýǵa berilgen «Kórkem Aqjeleń» degen kúidi oinaimyn. Qazanǵaptyń «Dúrkin-dúrkin» degen kúii shákirti Kádir Erjanov qoiǵan deidi. Sózdiń ózi aityp turǵandai, qazaq halqynyń qiynshylyq zamandaǵy, aýyr kezeńin sýretteidi. Bul kúi sóz býyndarynan qurylǵan, dúrkin-dúrkin, osy kúidi tyńdasańyzdar, kúidiń ózi sóilep turady. Shýmaqtarmen qurylady. Jalpy Qazanǵaptyń kúileri osyndai filosofiialyq, ártúrli tarihi jaǵdailarǵa arnap shyǵarylǵan. Búgin birinshi týrda úsh kúi tartamyz, erteń ekinshi týr bolady. Ekinshi týrda «Domalatpai Aqjeleń», «Boztarǵai» kúileri men tańdaýǵa berilgen kúilerin oinaimyz. Men Qazanǵaptyń «Kári Aqjeleń» kúiin oinaiyn dep jatyrmyn. Qazanǵapta Aqjeleń janry jaqsy damyǵan. Aqjeleń degen kúi janr. Kóbinese, ásemdik, naziktik, áieldiń beinesin beredi», – deidi jas dombyrashy Dýman Hamitov.
Birinshi týrǵa alǵashqy bolyp qatysyp úlgergen Umit Art Space Balalar shyǵarmashylyǵyn damytý ortalyǵynyń shákirti Nurdáýlet Abdikadirov óz áserimen qýana bólisti.
«Tapsyrmada berilgen eki kúimen qatar, tańdaýǵa berilgen «Qos qyranym» kúiin oinap shyqtym. Oinaǵanym, ázirge kóńilimnen shyqty. Buiyrsa, ekinshi týrǵa ótip jatsaq, júldeli oryndardyń birinen úmitkermin», – deidi Nurdáýlet Abdikadirov.
Foto: Kókil mektebiniń baspasóz qyzmetinen
Aita keteiik, baiqaý eki kúnge jalǵasatyn bolady. Al dombyrashylardyń ónerine QR eńbek sinirgen óner qairatkeri, folklortanýshy Karima Saharbava, QR mádniet qairatkeri Saǵatbek Qaliev, kúishi, kompozitor Tólepbergen Toqjanov, QR mádeniet salasynyń úzdigi, kúitanýshy Baian Igilik, qazanǵaptanýshy Asylbek Kenegesov, dástúrli kúishi Altynbek Úmbetov, «Kókil» mektep-kolledjiniń direktory Abdýlhamit Raiymbergenov qazylyq etip, baǵalaidy.
