Almatyda qurylysshylar «Nur-Múbarak» islam ortalyǵynyń aýmaǵyndaǵy magistraldy sý qubyryn zaqymdap aldy. Jarylǵan qubyrdy «Almaty sý» brigadasy qalpyna keltirip jatyr, dep habarlaidy QazAqparat.
«Nur-Múbarak» islam ortalyǵynyń aýmaǵynan ótetin diametri 800 mm sý qubyryn jeke qurylysshylar jer jumystaryn júrgizý kezinde zaqymdady. Alaida, bul jumystardy atqarýǵa «Almaty sý» MKK-dan kelisim alynbaǵan.
«Qazir mamandar qubyrdy qalpyna keltirip jatyr. Sol sebepti, Seifýllin – ál-Farabi – Sátbaev – Hodjanov kósheleriniń boiynda ornalasqan úiler men ǵimarattarǵa sýyq sý berý shekteldi», – dep habarlady «Almaty sý» MKK baspasóz qyzmetinen.
Kompaniia málimetinshe, jóndeý jumystary keshke deiin jalǵasady. Sýyq sý saǵat 18.00-de beriledi.
