Almatyda dárigerler qulaǵan ushaqta zardap shekken balalardyń jaǵdaiy týraly aityp berdi, dep habarlaidy "Ult aqparat".
Qaiǵyly oqiǵadan soń shuǵyl meditsinalyq kómek kórsetý ortalyǵyna 9 bala jetkizilgen.
«Bizge 9 bala jetkizildi. Onyń úsheýi - bir jasqa deiingi balalar. 3 bala bólimshede jatyr. Qalǵan 6 bala jansaqtaý bóliminde. San súiegi synǵan eki balaǵa ota jasaldy. Jaǵdailary birqalypty. Ómirine esh qaýip tónip turǵan joq. Barlyq meditsinalyq preparattar jetkilikti. Balalardyń ata-analary aman dep estidik. Týystary kelip balalardy kórip ketti», - dedi ortalyqtyń bas dárigeri Abai Qusaiynov.
Aita keteiik, búgin tańerteń Almatydan Nur-Sultan qalasyna ushyp shyqqan ushaq radardan joǵalyp ketti. Keiin 93 jolaýshy men 5 ekipaj múshesi bar ushaqtyń apatqa ushyraǵany málim boldy. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty.
