Almaty qalasynyń taýarlar men qyzmetterdiń sapasy men qaýipsizdigin baqylaý departamentinde monitoring toptarynyń jumysy barysynda sońǵy aptada 10 nysanda jáne 51 jeke tulǵanyń karantin rejimin buzǵany anyqtaldy. Salynǵan aiyppuldyń jalpy somasy - 5 mln teńge, dep habarlaidy "Ult aqparat".
«Monitoringi toptary osy jyldyń 17 tamyzynan beri shaǵyn jáne orta biznes salasynda epidemiialyq talaptardy saqtaýyna qatysty 9 myńnan astam tekserý júrgizdi. Ákimshilik quqyq buzý boiynsha 3801 hattama toltyryldy. 2693 jeke tulǵaǵa maska rejimin buzǵany úshin aiyppul salyndy. Shaǵyn jáne orta biznestiń 1635 sýbektisi óz erkimen qyzmetin toqtatty. Sottyń qaraýyna 19 material tapsyryldy» dep habarlady qala ákimdiginiń baspasóz qyzmeti.
Negizgi tártip buzý faktileri – maska rejiminiń saqtalmaýy, jumys rejiminiń buzylýy, dezinfektsiialyq quraldardyń joqtyǵy, sonymen birge jappai kópshilik sharalardy uiymdastyrý.
«18 qyrkúiekte Jetisý aýdany Jangeldin kóshesi, 193 mekenjaiynda ornalasqan «Daniiar» meiramhanasynda uzatý toi ótkizilgeni týraly aqparat keldi. Odan keiin jedel túrde monitoring toby Jetisý aýdanynyń jergilikti politsiia qyzmetiniń qyzmetkerlerimen birlesip tekserýge bardy. Banket 50 adamnyń qatysýmen ótkizilgen. Jeke kásipkerge QR Ákimshilik quqyq buzý kodeksiniń 425-baby 1-tarmaǵy boiynsha 230 AEK mólsherinde aiyppul salyndy» delingen habarlamada.
Budan bólek, 20 qyrkúiekte túngi ýaqytta Medeý aýdanynda jekemenshik úide qudalyq ótkizilip jatqany týraly aqparat kelip túsken. Tekserý barysynda aqparat rastalǵan. Shara uiymdastyrýshylaryna qatysty eki ákimshilik hattama toltyryldy.
«Sonymen birge, Áýezov aýdanynyń monitoring toptarynyń jumysy barysynda «Miata» kafeteriiniń túngi 23-00-den keiin jumys istegeni, sondai-aq, adamdardyń toptasyp, jinalǵany anyqtaldy. Ákimshilik quqyq buzý kodeksiniń 425-baby 1-tarmaǵyna sáikes 230 AEK mólsherinde aiyppul salyndy. Bas memlekettik dárigerdiń 2020 jylǵy 15 tamyzdaǵy qaýlysyna sáikes, úilený toiyn, mereitoi, qudaiy tamaq ótkizýge tyiym salynǵan. Sonymen birge úige kóp adamnyń kelýine bolmaidy. Bul sharalar koronavirýs infektsiiasynyń taralý qaýpin tómendetý úshin qajet» delingen aqparatta.
Eske salaiyq, Almaty qalasy ákiminiń tapsyrmasymen 26 monitoring toby karantin sharalarynyń saqtalýyn qadaǵalaidy.
Onyń quramyna aýdan ákimdikteriniń ókilderi, taýarlar men qyzmetterdiń sapasy men qaýipsizdigin baqylaý departamenti jáne politsiia qyzmetkerleri engen.
