Almaty turǵyny lift aldynda itti aiaýsyz sabady, - dep habarlaidy Tengrinews.kz tilshisi.
Janýardy soqqynyń astyna alyp jatqan sáttiń videosyn Facebook qoldanýshysy jariialady. Kadrlardan er adam ittiń basynan birneshe ret tepkenin kórýge bolady. Ittiń ózi er adamdy qappaidy. Jazba avtorynyń aitýynsha, oqiǵa "Asyl Taý" turǵyn úi kesheninde bolǵan.
Bul istiń mán-jaiyn bilý úshin oqiǵa ornyna politseiler barǵan. Keiin Almaty politsiia departamenti bastyǵynyń tergeý jónindegi orynbasary Rýstam Ábdirahmanovtyń Facebook jelisindegi paraqshasynda itti sabaǵan er adamnyń keshirim suraǵan videosy jariialandy.
Rýstam Ábdirahmanov janýarǵa qatygezdik kórsetkeni úshin 1999 jyly týǵan Jarqyn Suńqar ustalǵanyn atap ótti. Almaty qalalyq PD basshysynyń orynbasary ol keshirim suraýmen jaýapkershilikten qutylmaitynyn túsindirdi.
"Búgin, 26 qarashada Instagram jáne Facebook jelisinde jariialanǵan jazbada bizdi belgiledi. Bul jazba turǵyndar arasynda qyzý talqylandy. Quqyq buzýshylyq jelide jariia bolyp, turǵyndardyń narazylyǵyn týdyrǵan jaǵdaida tártip buzýshylar kópshilik aldynda keshirim suraidy. Keshirim suraý videosy jariialanǵannan keiin tergeý jalǵasady, al tártip buzýshylar Qazaqstan Respýblikasynyń zańnamasyna sáikes jazalanady", - dep jazdy Rýstam Ábdirahmanov.
Politsiia málimetinshe, qojaiynynan tartyp alynǵan it Retrivery Help Almaty qoryna berilgen. Qordaǵylardyń málimdeýinshe, it bir aiaǵyn aqsap basady. Oǵan endi kinolog qaraidy, keiin itti qaiyrymdy jandarǵa beredi.
