Qalanyń erekshe mártebesi týraly zańnan soń Almatyda kóshpeli saýda oryndarynyń ornalasýyn retteitin ereje bekitiletin boldy. Bul týraly búgingi brifing barysynda «Almaty damý ortalyǵy» AQ basqarma tóraǵasy Sanjar Iztileýov aitty, dep habarlaidy QazAqparat.
«Bul erejeleniń bekitilýi qalanyń sáýlettik kelbetin jaqsartýǵa, turǵyndardyń qajettiligine qarai kóshpeli saýda nysandaryn ornalastyrýǵa múmkindik beredi. Salyq túsimi kóbeiip, kólegeili ekonomikanyń kólemin azaitady. Bul óz kezeginde shaǵyn jáne orta kásiporyndar úshin biznes klimatty jaqsartýǵa múmkindik bolmaq», - dedi qala ákiminiń orynbasary Muhit Ázirbaev.
Eń bastysy bul nysandardy ornalastyrýda balama saýda oryndarynyń joqtyǵy, injenerlik jelilerdiń bolǵany, jaiaý júrginshiler men kólikke kedergi keltirmeýi eskeriletin bolady.
Shaǵyn jáne orta kásiporyndarǵa qala qurylysy erejeleri men dizain kod aiasynda arnaiy usynys beriledi. Sondyqtan, kásipkerge eskizdi bekitý úshin quzyrly organdy jaǵalap taban tozdyrýdyń qajettiligi bolmaidy.
«Almaty biznesti júrgizý men ómir súrýge yńǵaily qala bolýy tiis. Jaz, kúz mezgilinde adamdar syrtta otyryp tamaqtanǵysy keledi. Jazǵy tamaqtaný oryndary sáýlet normalaryna sai jasalýy tiis», - dedi qala ákiminiń orynbasary.
Sanjar Iztileýov atalǵan usynystardyń barlyǵy Almaty qalalyq kásipkerler palatasynda talqylanatynyn aitty.
Aita ketý kerek, QR Prezidenti Qasym-Jomart Toqaevtyń Joldaýynda Úkimetke úsh iri qalanyń ákimdikteriniń quzyryn keńeitý týraly tapsyrma berilgen bolatyn.
Atap aitqanda, olarǵa qala qurylysy saiasaty, kólik infraqurylymy, sáýlettik kelbetin ózgertýge quzyryn keńeitý týraly aitylǵan. Joldaýdan soń QR Ulttyq ekonomika ministrligi men memlekettik organdar birlese otyryp QR Úkimetine usynystar berdi. Osylaisha 28 jeltoqsanda Memleket basshysy tiisti Jarlyqqa qol qoiyp, «Almaty qalasynyń erekshe mártebesi týraly zań» qabyldandy.
