Búgin koronavirýsqa bailanysty Almaty qalalyq sanitariialyq-epidemiologiialyq baqylaý departamenti basshysynyń orynbasary Ásel Qalyqova brifing ótkizdi. Onda qaladaǵy epidemiologiialyq ahýal týraly aityldy, dep habarlaidy "Ult aqparat".
Onyń aitýynsha, Almatyda epidemiologiialyq jaǵdai ushyǵyp tur. Qala burynǵydai «qyzyl» aimaqta.
«Pandemiia bastalǵaly qalada virýs juqtyrýdyń 34 598 jaǵdaiy tirkeldi. Al 2021 jyldyń basynan beri 16 077 jaǵdai anyqtaldy, onyń 9 525 jaǵdaiy tek naýryz aiynda tirkelgen. Iaǵni naýryz aiynda jurtshylyq arasynda virýstyń taraýy órshi túsken. Sońǵy 7 kúndegi virýstyń taralý dinamikasy óte joǵary, máselen, 25 naýryz kúni 333 jaǵdai anyqtalsa, 31 naýryzda ol 515-ke jetti», - deidi ol.
Sonymen qatar ol virýsty kimder kóptep juqtyryp jatqanyn aitty.
«Keshe virýs anyqtalǵandardyń kópshiligi - jeke kásipkerlikpen ainalysatyndar nemese jaýapkershiligi shekteýli seriktestikte jumys isteitinder. Sondai-aq jumyssyzdar da bar. Virýsty negizinen osy sanattaǵy adamdar juqtyryp jatyr», - dedi epidemiolog dáriger.
