Almatyda koronavirýsqa qarsy vaktsinatsiia birneshe kúnge shekteledi. Bul týraly onlain brifing barysynda qalalyq qoǵamdyq densaýlyq saqtaý basqarmasynyń bastyǵy Nariman Tabynbaev málim etti, dep habarlaidy QazAqparat.
«Eki kún ishinde Almaty qalasynyń 17 myńnan asa turǵynyna vaktsina salyndy. Aýrýhanalardan bólek, Asia Park saýda oiyn-saýyq ortalyǵy men Respýblika saraiynda vaktsinatsiia júrgizildi. Búgin kem degende 10 000 adamǵa vaktsina salynady dep oilaimyn. 3-4 kúnde vaktsinanyń jańa partiiasy keledi. Jańa partiia jetkizilgenge deiin vaktsinatsiiany shekteý qajet bolady. Qalǵanyn tek Densaýlyq saqtaý ministrligi usynǵan adamdar kontingentine salýǵa tyrysamyz. Erteń ekpe jasalady, biraq sońǵy eki kúndegidei emes, shekteýli mólsherde», - dedi ol.
Nariman Tabynbaev almatylyqtardy alańdamaýǵa shaqyryp, sáýirde vaktsina jetkilikti bolatynyn aitty.
«Sáýir aiynda vaktsina jetkilikti bolady dep oilaimyn. Biz vaktsinatsiiany tek meditsinalyq mekemelerde ǵana emes, halyqty keńinen qamtý úshin daiyndalǵan vaktsinatsiia pýnkterinde de jasaý kerektigin túsindik. Biz erteń vaktsinatsiia jasaimyz, biraq shekteýli mólsherde. Osy eki kúndegidei aýqymda emes», - dedi qalalyq qoǵamdyq densaýlyq saqtaý basqarmasynyń bastyǵy.
