Almatyda koronavirýs juqtyrǵan balalar sany kúrt kóbeidi. Bul týraly onlain brifing barysynda Almaty qalasy sanitariialyq-epidemiologiialyq baqylaý departamenti basshysynyń orynbasary Ásel Qalyqova aitty, dep habarlaidy QazAqparat.
Spikerdiń aitýynsha, Almatyda epidemiologiialyq jaǵdai ýshyǵyp tur. Jańa shtamdardyń kontagiozy joǵary. Aldyńǵy bazalyq shtammen salystyrǵanda jańa shtamdardyń juqtyrý kórsetkishi 70%-ǵa deiin joǵary. Iaǵni, bul infektsiia – óte juqpaly.
«Sońǵy aptada balalar arasynda indetti juqtyrý kúrt ósti. Mysaly, 14 jasqa deiingi naýqas balalardyń sany 7%-dan 11%-ǵa deiin ulǵaidy. Sondai-aq, bir jasqa deiingi balalar arasynda virýs juqtyrý óskenin baiqap otyrmyz. 1 naýryzda 10 jaǵdai tirkelse, qazir 55 jaǵdaiǵa deiin jetip otyr. Ózge jastaǵy adamdar arasynda virýs juqtyrý burynǵydai qalypta»,- deidi Ásel Qalyqova.
Sondai-aq, ol otbasy músheleri arasynda virýs juqtyrý oqiǵasy da artqanyn jetkizdi.
«Virýsty otbasy múshelerinen juqtyrý oqiǵasy 34 paiyzǵa artqan. Al saýda oryndarynda virýs juqtyrý jaǵdaiy kerisinshe 22 paiyzǵa deiin azaiǵan. Oǵan demalys kúnderi saýda-sattyq oryndary men bazarlar jumysynyń toqtatylýy yqpal etti. Degenmen aýla ishindegi dúkenderde virýs juqtyrý áli de joǵary deńgeide», - deidi ol.
Almaty qalasy «qyzyl» aimaqta. Epidemiia bastalǵaly qalada 33 012 naýqas virýs juqtyrǵan.
