الماتىدا كوروناۆيرۋس جۇقتىرعان بالالار سانى كٷرت كٶبەيدٸ. بۇل تۋرالى ونلاين بريفينگ بارىسىندا الماتى قالاسى سانيتارييالىق-ەپيدەميولوگييالىق باقىلاۋ دەپارتامەنتٸ باسشىسىنىڭ ورىنباسارى ەسەل قالىقوۆا ايتتى, دەپ حابارلايدى قازاقپارات.
سپيكەردٸڭ ايتۋىنشا, الماتىدا ەپيدەميولوگييالىق جاعداي ۋشىعىپ تۇر. جاڭا شتامداردىڭ كونتاگيوزى جوعارى. الدىڭعى بازالىق شتاممەن سالىستىرعاندا جاڭا شتامداردىڭ جۇقتىرۋ كٶرسەتكٸشٸ 70%-عا دەيٸن جوعارى. ياعني, بۇل ينفەكتسييا – ٶتە جۇقپالى.
«سوڭعى اپتادا بالالار اراسىندا ٸندەتتٸ جۇقتىرۋ كٷرت ٶستٸ. مىسالى, 14 جاسقا دەيٸنگٸ ناۋقاس بالالاردىڭ سانى 7%-دان 11%-عا دەيٸن ۇلعايدى. سونداي-اق, بٸر جاسقا دەيٸنگٸ بالالار اراسىندا ۆيرۋس جۇقتىرۋ ٶسكەنٸن بايقاپ وتىرمىز. 1 ناۋرىزدا 10 جاعداي تٸركەلسە, قازٸر 55 جاعدايعا دەيٸن جەتٸپ وتىر. ٶزگە جاستاعى ادامدار اراسىندا ۆيرۋس جۇقتىرۋ بۇرىنعىداي قالىپتا»,- دەيدٸ ەسەل قالىقوۆا.
سونداي-اق, ول وتباسى مٷشەلەرٸ اراسىندا ۆيرۋس جۇقتىرۋ وقيعاسى دا ارتقانىن جەتكٸزدٸ.
«ۆيرۋستى وتباسى مٷشەلەرٸنەن جۇقتىرۋ وقيعاسى 34 پايىزعا ارتقان. ال ساۋدا ورىندارىندا ۆيرۋس جۇقتىرۋ جاعدايى كەرٸسٸنشە 22 پايىزعا دەيٸن ازايعان. وعان دەمالىس كٷندەرٸ ساۋدا-ساتتىق ورىندارى مەن بازارلار جۇمىسىنىڭ توقتاتىلۋى ىقپال ەتتٸ. دەگەنمەن اۋلا ٸشٸندەگٸ دٷكەندەردە ۆيرۋس جۇقتىرۋ ەلٸ دە جوعارى دەڭگەيدە», - دەيدٸ ول.
الماتى قالاسى «قىزىل» ايماقتا. ەپيدەمييا باستالعالى قالادا 33 012 ناۋقاس ۆيرۋس جۇقتىرعان.
